Ո՞ւր հասավ հայրենադարձվող 100 ընտանիքը. Մխիթար Հայրապետյանը կրկին բյուջեի հաշվին ԱՄՆ-ում է

Մխիթար Հայրապետյանը կրկին ԱՄՆ-ում է, միայն թե՝ այս անգամ՝ այլ պաշտոնական դիրքով:

Նախկինում նախարարական պորտֆել զբաղեցնող երիտասարդն այսօր ՀՀ ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահն է, բայց վոյաժի ուղղությունը չի փոխել: Տպավորություն է, որ Մխիթար Հայրապետյանին պարզապես դուր է եկել ԱՄՆ-ն ու մանկության երազանք է եղել այդ երկիրը, իսկ այսօր հնարավորություն է ընձեռվել պետական բյուջեի հաշվին իրականացնել այդ երազանքը:

Մի քանի հերթապահ հանդիպումներ, այցելություններ՝ հոգևոր և մշակութային կենտրոններ, անպայման ծաղիկների խոնարհում, սա հիմնական օրակարգն է նման այցելությունների ընթացքում:

Հիշեցնենք, որ Մխիթար Հայրապետյանը Սփյուռքի նախարար աշխատելու ընթացքում արդեն մեկ անգամ նմանաբովանդակ օրակարգով այցելել էր ԱՄՆ և Երևան գալով՝ բավականին լուրջ հայտարարություն արել՝ մեջբերում ենք՝ «ԱՄՆ-ում ավելի քան հարյուր ընտանիք ինձ ներկայացրին, որ տները վաճառքի են հանել, որպեսզի վերադառնան հայրենիք: Դոհայից Երևան օդանավում շուրջ 15 ընտանիք ուղղակի հայրենադարձներ էին. մարդիկ մոտեցան ինձ, իրենց իրերը ցույց տվեցին ու ասացին, որ գալիս են հայրենիք: Այս պահին հարյուր, հազար անգամ ավելի շատ մարդիկ կան, որ ունեն ցանկություն հայրենիք վերադառնալու, բայց միայն որոշակի խնդիրներ լուծելուց հետո կարող ենք ակնկալել, որ նրանք վերադառնալու են»:

Այս հայտարարությունից հետո, իհարկե, այդպես էլ չգտնվեցին մարդիկ, որ հայրենադարձ են եղել, ԱՄՆ-ում թողել տունն ու ունեցվածքը վեադարձել հայրենիք հանուն Նիկոլ Փաշինյանի հաստատած իշխանության, սակայն այդ իշխանությունը տվել է հնարավորություն, որ Մխիթար Հայրապետյանի պես միջակ գործիչները կարողանան արտերկրյա ճանապարհորդությունները բյուջեի հաշվին ձևակերպել և բավարարել իրենց ամբիցիաները: Թե ինչ կտա մեր երկրին Հայրապետյանի հերթական այցելությունը ԱՄՆ, դժվար է ասել, բայց ինչպես կասեր դասականը՝ «տառապանքս փորձ ունի», տվյալ դեպքում սա հերթական, երկրի համար ոչ մի արդյունք չունեցող այց է, որի ժամանակ խոշոր գումարներ են մսխվում:

Մնում է հուսալ, որ Հայրապետյանը ԱՄՆ,կատարած հերթական այցի ժամանակ գոնե կպարզի, թե հայրենիք վերադարձող 100 ընտանիքն ուր է հասել:

NEWSPRESS.am