Ում նյարդերի ամրությունն են ստուգում Բաքվում

Ադրբեջանի նախագահի խորհրդական Հիքմեթ Հաջիևը հայտարարել է, որ Հայաստանի և Ադրբեջանի ոչ ղեկավարների և ոչ էլ ԱԳ նախարարների հանդիպում մոտ ապագայում չի նախատեսվում, և ԵԱՀԿ ՄԽ համանախագահների ռեգիոնալ այցի շրջանակում Բաքու կատարած այցի ժամանակ Ադրբեջանը պարզապես հերթական անգամ ներկայացրել է Ղարաբաղյան հակամարտության կարգավորման մասին Ադրբեջանի պաշտոնական դիրքորոշումը` վերահաստատելով, որ կողմնակից է հակամարտության բանակցային կարգավորմանը և վերջ:

Նա նաև նկատել է, որ հայկական կողմն է սկսել պահանջներ առաջ քաշել և պահանջել է, որպեսզի Հայաստանին միջազգային հանրությունն ու համանախագահները վերադարձնեն կառուցողական հուն: Սա այն դեպքում երբ նույն օրվա մեջ Ադրբեջանի ԱԳ նախարարության խոսնակ Լեյլա Աբդուլաևան հայտարարել էր, որ ներկայումս ընթանում են Հայաստանի և Ադրբեջանի ղեկավարների հանդիպման նախապատրաստական աշխատանքները:

Բավական հետաքրքիր իրավիճակ է ստեղծվում, ըստ էության: Մի կողմից, Բաքուն արտաքին քաղաքական գերատեսչության մակարդակով ինֆորմացիա է տարածում, որ այո հանդիպում լինելու է Փաշինյան-Ալիև ֆորմատով, մյուս կողմից` արդեն նախագահի ապարատի մակարդակով, եթե չասենք հերքում, ապա գոնե չի հաստատում, որ այդ հանդիպումը լինելու է և ավելին մեղադրական հայտարարություններ է հնչեցնում Հայաստանի հասցեին:

Ի՞նչ է ստացվում: Կամ Բաքուն նախապես ունեցել է հանդիպման մտադրություն, իսկ հետո որոշել է հրաժարվել այդ հանդիպումից, կամ էլ ուզում է փորձել դիմացինի նյարդերը, հասկանալու համար թե մինչև ուր կարող է դիմանալ հայկական կողմը: Այն, որ հանդիպումը կարող է չեղարկվել, քիչ հավանական է, քանի որ, ըստ երևույթին, այն լինելու է եռակողմ՝ Փաշինյան-Ալիև-Պուտին: Հետևաբար գուցեև փորձվում են ոչ թե Երևանի, այլ Մոսկվայի նյարդերը: Սա ևս տարբերակ է, որն ամենևին չպետք է աչքաթող անել:

Ամեն դեպքում, պարզ է, որ Բաքուն որոշակիորեն կոշտացրել է իր կեցվածքը և մի որոշ ժամանակ տիրապետող դարձած բարյացակամ խոսքուզրույցն այլև չկա ադրբեջանական պատասխանատուների հռետորաբանության մեջ:

NEWSPRESS.am