Եղած իրավիճակում զգաստանալը և զգաստացնելը լավ բան է. Ռուբեն Գևորգյանը մասնակցում է «Հողեր չունենք տալու» ակցիային

Բոլորն էլ դեմ են հողեր հանձնելուն: Այդ մասին Ազատության հրապարակում լրագրողների հետ զրույցում ասաց Ազգային ժոողովի նախկին պատգամավոր, Երդվյալ ազատամարտիկների միության նախագահ Ռուբեն Գևորգյանը: 

«Դեռ հարց է՝ այսօրվա իշխանությունը հող հանձնող է, թե հանձնող չէ: Չի կարելի երբեք մեղադրել էդ մարդուն»:,- նշեց նա:

Լրագրողի դիտարկմանը, թե իշխանությունները նշում են, որ իրենք որևէ բան չեն բանակցում և հետևաբար տարածքների զիջման մասին խոսելն անհեթեթություն է, Գևորգյանը պատասխանեց, որ տարածքների մասին բոլորն էլ կարող են խոսել և դա անհեթեթություն չէ. «Մենք մեր տանն էլ, դուք ձեր տանն էլ, շրջապատում, հասարակական դաշտում բոլորն էլ կարող են նույն հարցերն արծարծել. և՛ ոգևորվեն, և՛ հրապուրվեն ընդհանուր իրավիճակից, ո՞վ է արգելք հանդիսանում»:

Ըստ Գևորգյանի՝ միշտ էլ իմաստ ունի խոսել ազգային գաղափարախոսության մասին. դա է եղել մեր ժողովրդի այն սկզբունքը, որի հիման վրա մենք մինչ այսօր գոյատևում ենք: 

Հարցին, թե այդ դեպքում, ինչի՞ համար է ակցիան, եթե տարածքներ զիջելու խնդիր չկա, Գևորգյանը պատասխանեց. «Մենք երբեք իրավունք չունենք մեղադրելու, որ էսօր տարածք են ուզում հանձնեն կամ չեն ուզում հանձնեն, կամ տարվող խնդիրները ճիշտ են կամ սխալ են, մենք իրավունք չունենք քննադատելու: Դա թող քաղաքական դաշտում քննադատեն, բայց եղած իրավիճակում զգաստանալը և զգաստացնելը լավ բան է: Զգաստացնելն այն է, որ հիշեցնենք, որ երբեք միակարծիք չի լինելու այս հարցը կամ տարակարծություններ, որովհետև ճիշտ է՝ երկրի տերը ժողովուրդն է, բայց մեր երկիրը ճակատագրի տերեր ունի: Ճակատագրի տերերը նրանք են, ովքեր կյանք ու արյուն չեն խնայել մեր երկրի համար»:

Ըստ Գևորգյանի իրենք՝ «որպես հայրենասիրական դաշտի տղաներ», «էս երկրի համար պայքարած տղերք», յուրաքանչյուրն իր հերթին, պարտավոր է իր խոսքն ասելու:

«Սա մեղադրանք չի, ակցիա չի իշխանության դեմ, թե գիտե՞ք ինչ կա, էս ի՞նչ եք անում: Դա սխալ կլինի, մենք դեռ չգիտենք՝ ինչ են անում: Մենք պարզապես քայլեր ենք անում, թեկուզ և հենց ամբողջ աշխարհը՝ միջազգային հանրությունը զգա, որ մեր երկրում միանշանակ չի հողերի խնդրի կարգավորման հարցը: Դա անգամ նպաստ ա բերում էսօրվա իշխանությանը: Քաղաքական դաշտում ավելի լուրջ տեղ չի՞ տալիս»,-իր հերթին լրագրողներին հարցրեց ազատամարտիկը՝ հավելելով, որ ինքն այս ակցիային միայն հյուր է և իրավունք ունի իր երկրում ցանկացած վայրում հայտնելու իր կարծիքը: