...Այդ ժամանա՞կ էլ չեք սրտնեղում. հարցեր ու ի պատասխան Մարիամ Փաշինյանի գրառմանը

Ֆեյսբուքյան օգտատեր Հրանտ Ավետիսյանը գրառմամբ պատասխանել է վարչապետ Նիկոլ Փաշինյանի դստեր՝ Մարիամ Փաշինյանի գրառմանը:

«Իմ պատասխանը Մարիամ Փաշինյանին

Երբ տարիներ շարունակ Ձեր հայրը օգտագործելով իր ձեռքի տակ եղած բոլոր միջոցները շարունակ ցեխ էր շպռտում իշխանությունների վրա՝ այդ ժամանակ չէի՞ք սրտնեղում։ Երբ Փաշինյան Նիկոլը ԱԺ ամբիոնից խոսում էր օդից կախված լուրերով, ասելով, թե օդից կախված լուրերի համաձայն՝ Սերժ Սարգսյանը Մոնակոում 50․000․000$ է պարտվել՝ այդ ժամանակ չէի՞ք սրտնեղում։ Երբ Ձեր ընտանիքի իշխանության գալու ճանապարհին անընդհատ շեշտում էր, որ արագաչափերը Սաշիկի անձնական բիզնեսն են և Ձեր հայրը նույնիսկ մի ոտանավոր արտասանեց այդ առիթով, հետո իշխանության գալուց պարզվեց, որ դրանք ոչ միայն Սաշիկինը չեն՝ այլ նաև ծառայում են ժողովրդին, այդ ժամանակ չէ՞իք սրտնեղում։ Երբ ահաբեկիչները գրավեցին ՊՊԾ գունդը և սկսեցին սուտ լուրեր տարածել՝ իբր քաղաքի մասշտաբով կարևոր կառույցներ ունեն իրենց հսկողության տակ, այդ Ձեր ընտանիքին պատկանող լրատվականն էր առաջինը տարածում այդ իրականությունից հեռու լուրերը՝ այդ ժամանակ էլ չսրտնե՞ղվեցիք։

Եվ հակառակը, երբ որևէ օգտատեր կամ լրագրող փորձում է արտահայտել իր տեսակետը կատարվողի մասին, երբ որևէ մեկը փորձում է միակարծիք չլինել ամբոխի հետ՝ նույն ֆեյսբուքյան տիրույթում Ձեր հայրիկի նկարներով ողողված ֆեյք օգտատերեր սկսում են հայհոյել և սպառնալիքների տեղատարփ հնչեցնել տվյալ անձի հանդեպ։ Իսկ այս դեպքում Դուք չե՞ք սրտնեղում։ Երբ մարդ իր ազատ կարծիքը հայտնելու համար պիտակավորվում է որպես հակահեղափոխական, որպես սև՝ այդ ժամանակ էլ չե՞ք սրտնեղում։ Երբ որևէ թերություն կամ բաց բարձրաձայնելու համար մարդիկ առողջ քննարկումից տեղափոխվում են ընտանիքի հասցեին հնչող հայհոյանքների և սպառնալիքների՝ այդ ժամանակ էլ չե՞ք սրտնեղում։

Եվ վերջում՝ лучше грустить в лимузине чем в трущобах»,- գրել է օգտատերը: