Իսկ ֆեյքերի հայհոյանքներից ու ազատ խոսքի նկատմամբ ճնշումներից Մարիամը չի սրտնեղո՞ւմ

Նիկոլ Փաշինյանի ավագ դուստրը՝ Մարիամ Փաշինյանը սրտնեղել է, թե մամուլն արդար չէ իր ընտանիքի նկատմամբ՝ կեղծ լուրեր է տարածում:

Նա իր ֆեյսբուքյան իր էջում գրել է, թե՝ «Հայաստանում դեռ կան մարդիկ, ովքեր փորձում են հիասթափություն ու հուսահատություն մղել երկար տարիներ պայքարած ու վերջապես հաղթանակած ժողովրդի մեջ՝ այս դեպքում կեղծ լուրեր հրապարակելով մեր մասին: Շատերս տարբերում ենք ապատեղեկատվությունը ու դեղին մամուլը իրական տեղեկատվությունից, բայց կան շատերը, որ ճշգրտորեն չեն ուղղորդվում տեղեկատվություն որոնելիս»…

Նախ, կրկին չանդրադառնանք ծեծված այն թեմային, թե ժողովուրդ ասելով՝ կոնկրետ քանի տոկոսին ի նկատի ունի աղջնակը և այդ ո՞ւմ՝ իր ժողովրդի մյուս տոկոսի նկատմամբ հաղթանակի մասի՞ն է խոսքը, պարզապես արձանագրենք, որ կյանքը բումերանգ է. մի ժամանակ Մարիամի ծնողներն էին իրենց «Հայակական ժամանակով» մտնում սրա-նրա ընտանիք ու դուրս տալիս եղած-չեղածը, հիմա՝ մյուսներն են մտնում նրա ընտանիք…

Մարիամի գրառման մեջ աչքից չի կարող վրիպել նաև այն տողերը, որտեղ նա հույս է հայտնել, թե մի օր մամուլը կթևակոխի նոր փուլ և իրականությո՛ւնը կներկայացնի. «Այսօր Հայաստանում էդպիսի մամուլ չկա»,-գրել է նա:

Դարձյալ չի քննարկում նաև այն, որ այստեղ Փաշինյանի դուստրը արհեստականություն է հաղորդել իր ամբողջ տեքստին: Նա, իբր, փորձել է ցույց տալ, որ օբյեկտիվ է և փաստորեն՝ «Հայկական ժամանակին» ևս դասել է «կեղծ լուրեր հաղորդող» մամուլի շարքին:

Սակայն մյուս կողմից էլ՝ գուցե այս առումով ինչ-որ տեղ նա նաև ճիշտ է. «Հայկական ժամանակն» իսկապես արել է նման բան, բայց այստեղ հարցն այն է, թե ինչո՞ւ Մարիամն այն ժամանակ դա չէր նկատում: Ինչո՞ւ չէր սրտնեղում, երբ շատ հաճախ իր ծնողներին պատկանող լրատվամիջոցն էր կեղծ լուրեր տարածում. այստեղ ընդունված է հնչեցնել հռետորական հարցը՝ «բա Սերժի վախտով ինչի՞ չէիր խոսում»…

Հատկանշական է, որ «Սերժի վախտով» խոսելը Մարիամի հոր մենաշնորհն էր, իսկ ինքը՝ Մարիամը փոքր էր ու քաղաքականությունից գուցե գլուխ չէր հանում, որ սրտնեղեր կամ չսրտնեղեր, բայց նա գոնե հիմա նույն ոգևորությամբ պետք է արձագանքի ու սրտնեղի այն արատավոր երևույթից, որ իր հոր նկարով ֆեյսբուքյան ֆեյք օգտատերերը հայհոյում ու վիրավորում են իրենց ազատ խոսքն ու սթափ գնահատականներն արտահայտողներին: Նա պետք է սրտնեղի, որ առողջ քննադատությունները քարկոծվում են, իսկ քննադատողները հայտնվում իշխանության ու հատկապես ֆեյք օգտատերերի թիրախում (ընդհուպ՝ մինչև անձնական հեռախոսազանգեր ու սպառնալիքներ են լինում):

Այնպես որ, Մարիամի «սրտնեղելու մասին» սրտաճմլիկ տեքստը գուցե ավելի տպավորիչ ու անկեղծ կլիներ, եթե նրան սրտնեղելու առիթ տային նաև ստեղծված վախի ու անհանդուրժողականության մթնոլորտը, օրեցօր ավելացող գործազրկությունը, նպաստների կրճատումը, աղքատությունը, գնաճը, եկեղեցու քարկոծումը, կրթական ոլորտի անհաջողություններն ու էլի գլուխ բարձրացնող շատ արատավոր երևույթներ: Բայց քանի դեռ այդ ամենը Մարիամին չի անհանգստացնում ու նա դրանից չի սրտնեղում, ապա ավելի լավ է՝ պարզապես հանգիստ նստի իր տեղն ու չսրտնեղի…

Արմինե Մկրտումյան