«Սասնա ծռերի» դատական նիստերը կլինեն դռնփակ՝ միայն ԶԼՄ-ների մասնակցությամբ

ՊՊԾ գնդի գրավման գործով մեղադրվող «Սասնա ծռերի» 10 անդամների դատական նիստն այսուհետ կանցնի դռնփակ ռեժիմով:

Երևանի ընդհանուր իրավասության դատարանի Շենգավիթի նստավայրում, դատավոր Մեսրոպ Մակյանի նախագահությամբ տեղի ունեցող նիստն այսօր՝ փետրվարի 27-ին, ընդմիջվել էր, քանի որ Գևորգ Սաֆարյանը նիստի ընթացքում հիմար անվանեց ցուցմունք տվող ոստիկանին, ինչից հետո դահլիճում վիճաբանություն սկսվեց:

Թեև Գևորգ Սաֆարյանը վստահեցնում է, որ այդ ամենը տեղի ունեցավ քաղաքացիական համազգեստով ոստիկանների սադրանքի հետևանքով, սակայն փաստն այն է, որ արդեն երկրորդ անգամ նրա կողմից հնչեցրած ռեպլիկները միջադեպի ու լարվածության առիթ են դառնում:

Այս հանգամանքն էլ հենց առիթ դարձավ նիստը վարող դատավոր Մեսրոպ Մակյանի համար՝ որոշում կայացնելու առ այն, որ նիստերն այսուհետ դռնփակ են լինելու:

Նա իր խոսքում նկատեց, որ դեռ առաջին միջադեպի ժամանակ են  ցանկացել դռնփակ անցկացնել, սակայն որոշել են մեկ անգամ ևս հնարավորություն տալ մասնակցելու քաղաքացիներին: Իսկ այսօր արդեն, դատարանի համար պարզ դարձավ, որ քաղաքացիների ներկայությունն արհեստականորեն երկարաձգում է դատական նիստերը:

Դատավորը նշեց նաև, որ բոլոր լրատվամիջոցները կարող են ներկա գտնվել դատական նիստերին՝ նույնիսկ ուղիղ հեռարձակել, որպեսզի չխոչընդոտեն դատական նիստերի թափանցիկությունը, սակայն քաղաքացիներն այլևս չեն մասնակցի դրանց: