«Մուծվել» են, որ բանտ չգնան. իսկ ո՞ւր մնաց Փաշինյանի հայտարարությունը

Բոլորս ենք հիշում, թե ինչպես արտահերթ խորհրդարանական ընտրություններից առաջ Արարատի մարզում Նիկոլ Փաշինյանն «Իմ քայլի»-ի քարոզարշավի ժամանակ ասաց, որ առաջիկա հինգ տարվա ընթացքում խնդիր են դրել Զինված ուժերի կարիքների համար հավելյալ 2,5 մլրդ դոլար ծախսել, և այդ գումարը պետք է վճարեն ժողովրդին հայտնի կոռուպցիոներները։

Փաշինյանի հայտարարության առաջին ծիծեռնակները Սերժ Սարգսյանի եղբայր Ալեքսանդր Սարգսյանն ու մաքսայինի նախկին պետ Արմեն Ավետիսյանը դարձան։

Խարդախության համար մեղադրվող Սարգսյանն իր կամքով 9 506 000 000 ՀՀ դրամին համարժեք 19 600 000 ԱՄՆ դոլար է նվիրաբերել Արցախի Հանրապետության պաշտպանության բանակին. Sputnik Արմենիայի հարցմանն ի պատասխան՝ հայտնել է ՀՀ ԱԱԾ մամուլի կենտրոնի պետ Սամսոն Գալստյանը։

ԱԱԾ լրատվական ծառայության պետը նաև հաստատել է ՀՀ մաքսային պետական կոմիտեի նախկին նախագահ Արմեն Ավետիսյանի նվիրատվության մասին մամուլում գրված տեղեկությունը։

Փաստորեն, Արմեն Ավետիսյանն էլ պետությանն է նվիրել Ծաղկաձորում գտնվող, իրեն պատկանող «Գոլդեն Փելես» հյուրանոցը, որի վերաբերյալ, ի դեպ, Փաշինյանն ասում էր, որ պետք է վաճառեն և գումարը վերադարձնեն պետական բյուջե։

Անտարակույս, Սերժ Սարգսյանի եղբորը քամելն ու գողացածը բանակին ուղղելն օր օրի վարկանիշի անկում գրանցող իշխանության և նրա ղեկավարի համար կարող է կես քայլ առաջընթաց ապահովել, բայց ի՞նչ ազդակ է դա հանդիսանալու Հայաստանում օտարերկրյա ներդրողի համար, որը գուցե ցանկանա բիզնես հիմնել մեր երկրում։

Արդյոք բանտում չհայտնվելու դիմաց դիզած միլիոնները տալու կամ ձեռքբերած գույքը նվիրաբերելն օտարերկրյա ներդրողի մոտ ստեղծելո՞ւ է ներդրումային գրավիչ ֆոն, ինչի մասին իշխանություններն անընդհատ հայտարարում են։

Եթե գողացել է՝ թող բանտ նստի և պատասխան տա․ ստացվում է՝ ամեն գողացող կարող է մի բան տալ ու ազատվել դատապարտումից, իսկ ուր մնաց Կառավարության նիստի ընթացքում Նիկոլ Փաշինյանի այն հայտարարությունը, որ ժողովրդից գողացողը պետք է ամբաստանվի, խայտառակվի ու բանտ նետվի։

Փաստորեն, վերը նշված անձանց պարագայում գործում է միայն առաջին երկու տարբերակները...

NEWSPRESS.am