Վեդիի փոխոստիկանապետ Գրիգորյան Համլետը քթից մազ էլ չի հանում օպերատիվ աշխատելու համար. քաղաքացին կառավարության դիմաց բողոքում է (տեսանյութ)

Արդեն մեկ ամիս է՝ Արարատի մարզի Պարույր Սևակ գյուղի բնակիչ, հաշմանդամություն ունեցող  Կամո Մկրտչյանը ոստիկանության դռներն է թակում ու խնդրում գտնել իրենից գողություն կատարողներին, սակայն գողոնը դեռևս չի հայտնաբերվել:

NEWSPRESS.am-ի հետ զրույցում նա պատմեց, որ դեռ հունվարի 15-ին Արարատի մարզի Վեդի քաղաքի ոստիկանությունում գողության մասին հաղորդում է տվել, բայց օպերատիվ արձագանք չի եղել: Կամո Մկրտչյանը նկատում է, որ իրենք նույնիսկ մինչ հաղորդումը տալը գողության կոնկրետ օրը չեն իմացել, սակայն այս ընթացքում, ոստիկանության անգործության ֆոնին, իրեն հաջողվել է պարզել, թե երբ են գողություն արել, ուր են և ինչ մեքենայով են տարել իր ապրանքը:

«Վեդիի ոստիկանապետի տեղակալ Գրիգորյան Համլետը քթից մազ էլ չի հանում օպերատիվ աշխատելու համար, ես առաջին հերթին իրենից եմ բողոքում: Ես արդեն իմացել եմ նույնիսկ, թե ով է ինձնից գողացված ապրանքն առել»,- ասաց քաղաքացին ու նկատեց, որ իրեն հաջողվել է այդքան բան պարզել, մինչդեռ ոստիկանությունը դեռևս ոչ մի քայլ չի ձեռնարկել իրեն օգնելու համար:

«Ես խեղճացող տղա չեմ, մի ոտքով եմ, իսկ նա երկու ոտքով, բայց կարող եմ իմ հարցերը լուծել իմ ձևով, եթե չկարողանամ՝ ինձ մնում է մի բան, գնամ զենքով խփեմ, սա է ուզում էս պետությունը»,-ասում է Կամո Մկրտչյանն ու հավելում, որ ոստիկանությունն էլ այսօր ժողովրդի կողքին չէ:

«Ժողովուրդ ասած հասկացողություն գոյություն չունի»,- ասում է մեր զրուցակիցը:

Մանրամասները՝ մեր տեսանյութում