Փաշինյանը կրկին շոու է սարքել՝ գազի տարանցման մասին խոսելով

Նիկոլ Փաշինյանն իրանական այցի շրջանակներում հայտարարել է, որ Հայաստանը պատրաստ է տարանցիկ երկիր դառնալ իրանական գազի համար։ Հայաստանյան միջավայրում այս հայտարարությունը որոշակի խանդավառություն, իհարկե, առաջացրեց, սակայն այս հայտարարությունը, ինչպես և Փաշինյանի հայտարարությունների մեծ մասը, որոնք նա վարչապետի կարգավիճակում հնչեցրել է, կարելի է համարել հերթական պոպուլիստական շոուն։

Իհարկե, շատ լավ է, որ Հայաստանն ունենա նման հնարավորություն։ Սակայն, բարի մտադրություններն այլ են, իրականությունը՝ լրիվ այլ։ Նախ, Հայաստանը նման երկիր դառնալու ենթակառուցվածք չունի։ Պարզապես չունի։ Հայաստանը՝ որպես պետություն, չունի իր սեփական գազամուղը, խողովակաշարային ցանցը, որպես գազի տեղափոխման տրանսպորտային ենթակառուցվածք։ Հայաստանն ինքնուրույն ի վիճակի չէ գազային քաղաքականություն վարելու, գոնե առաջիկա չորս տասնամյակի ընթացքում, քանի որ ճիշտ այդքան ժամանակ ռուսական «Գազպրոմ»-ն իշխելու է հայաստանյան գազի ոլորտում։

Հայաստան-Իրան գազամուղը և առհասարակ բոլոր խողովակաշարերը պատկանում են հենց ռուսական գազային հսկային։ Ու բավական քիչ է հավանական, որ Իրանը, Փաշինյանի սիրույն, 10-20 միլիարդ դոլար կամ ավելի կտրամադրի ու Հայաստանում նոր խողովակաշարային ենթակառուցվածքներ կստեղծի։ Դա նույնիսկ ֆանտաստիկայի ժանրի մեջ չի տեղավորվում։

Բացի այդ։ Հայտնի է, որ Միացյալ Նահանգները նույնիսկ իրանական նավթագազային սեկտորում է սանկցիաներ սահմանել։ Հետևաբար, Փաշինյանը դժվար թե համարձակվի նման քայլի գնալ ու իր դեմ հանել ամերիկյան սանկցիոն համակարգը։ Ու դեռ հարց է, թե, օրինակ, Մոսկվան ինչպես կվերաբերվի, եթե իրոք նման հայտարարությունը փորձեն գործնական դաշտ տեղափոխել, քանի որ դա ուղղակի նշանակում է դեպի
Եվրոպա գազային դիվերսիֆիկացիայի աջակցում, իսկ հենց դա արդեն հարվածում է Մոսկվայի աշխարհաքաղաքական շահերին։

Ուստի մնում է միայն հին ու բարի տարբերակը։ Փաշինյանը հերթական շոուն է սարքել գազային հայտարարությամբ, որը, ով իմանա, գուցե համաձայնեցված է եղել և′ ԱՄՆ-ի, և′ Ռուսաստանի կողմից՝ որպես օդում կրակված դատարկ փամփուշտ։

NEWSPRESS.am