Կոռուպցիոն մութ գործարք ՊՆ-ում․ Դավիթ Տոնոյանն այս հարցով պետք է անհապաղ հրավիրվի վարչապետի մոտ

Թավշյա հեղափոխությամբ իշխանության եկած Նիկոլ Փաշինյանը ջանք ու եռանդ չի խնայում բոլորիս համոզել, որ Հայաստանում կոռուպցիա չկա․ պնդում է՝ գուցե լինեն մեկ-երկու մանր դեպքեր, սակայն երկրում համակարգային կոռուպցիա չկա։

Փաշինյանի այս հավաստիացումն, ինչպես նաև ևս մի քանիսը, բացարձակ չեն համապարասխանում այն իրականությանը, որում ապրում ենք։ Պարզվում է՝ կոռուպցիան արմատախիլ արված չէ երկրի կարևորագույն համակարգերից մեկում՝ Պաշտպանության նախարարությունում։ Ստացվում է՝ Պաշտպանության նախարարությունն այս առումով այնքան խոցելի է, որ այնտեղ կարող են հայտնվել տարատեսակ մութ գործարքների մեջ խրված ու մինչև ուղն ու ծուծը կոռուպցիայի մեջ թաթախված մարդիկ։

Խոսքն այս պարագայում բոլորովին վերջերս NEWSPRESS.am-ի հրապարակած՝ Հայաստանում «Կալաշնիկով» ինքնաձիգի АК-12 և АК-15 տեսակների արտադրություն հիմնելու սկանդալային գործարքի մասին է, որը փորձում է իրականացնել մի մարդ, ով արդեն իսկ հայտնվել է գերտերությունների ուշադրության կենտրոնում՝ խիստ վտանգավոր գործում՝ զենքի շուկայում։

Հիշեցնենք, որ օգոստոսի 21-ին Մոսկվայում Royalsys Engineering ltd. ընկերության և «Կալաշնիկով» կոնցեռնի միջև ստորագրվեց պայմանագիր՝ Հայաստանում Կալաշնիկովի ինքնաձիգի նոր նմուշների արտադրություն հիմնելու մասին։

Ըստ ստորագրված պայմանագրի՝ հայկական մասնավոր ընկերության կողմից Հայաստանում ռուսական զենք պետք է արտադրվի:

Այս գործարքն իսկապես պատմական կարելի էր համարել, եթե գործարքն իրականացվեր իրականում գոյություն ունեցող ընկերության հետ, ոչ թե Royalsys Engineering-ի, որը գրանցված չէ ո՛չ Հայաստանում, ո՛չ էլ ամբողջ աշխարհում, ուստի ստացվում է՝ Պաշտպանության նախարարությունը գործարք է սկսել գոյություն չունեցող մի կազմակերպության հետ։

Սա դեռ հերիք չէ, այդ գոյություն չունեցող կազմակերպությունն ունեցել է Պաշտպանության նախարարության լիցենզիա։

Այսինքն՝ Դավիթ Տոնոյանը տեղյակ է եղել, որ այդ կազմակերպությունն ուներ ՀՀ ՊՆ-ից ստացած լիցենզիա, բայց, չգիտես ինչու, տեղյակ չի եղել, որ նման կազմակերպություն գոյություն չունի ամբողջ աշխարհում։

Սա էլ դեռ բավարար չէ, ըստ մեր աղբյուրների, Royalsys Engineering ընկերության ղեկավար համարվող Դավիթ Գալստյանը, որն առավել հայտնի է որպես «Սուտինյոր» կամ «Պատրոն Դավիթ», գնել է ռազմական տեխնիկա, որը հայտնվել է ԴԱԻՇ-ի ձեռքում և օգտագործվել ամերիկացի զինվորների դեմ։

NEWSPRESS.am-ի ամերիկյան հավաստի աղբյուրների փոխանցմամբ՝ այս վերջին դիպվածով էլ պայմանավորված` այժմ ԱՄՆ-ն քննարկում է պատժամիջոցների փաթեթ, որը պետք է կիրառվի ՀՀ պաշտպանության նախարարության նկատմամբ, և այն դեռ ուժի մեջ չի մտել բացառապես հայկական լոբբիստական ջանքերի շնորհիվ։ Նշենք, որ ԱՄՆ-ի համար չկա ավելի մեծ սարսափելի հանցագործություն, քան ԴԱԻՇ-ի ձեռքում հայտնված զենքի կիրառումն իր զինվորների դեմ։

Ավելի ուշ կհրապարակենք նաև Դավիթ Գալստյանի վերաբերյալ նոր տեղեկատվություն, իսկ մինչ այդ, կարծում ենք, որ Դավիթ Տոնոյանն այս հարցով պետք է անհապաղ հրավիրվի վարչապետի մոտ՝ Դավիթ Գալստյանի հետ գործարքի իրական հիմքերն ու պատճառները պարզաբանելու համար։

Շարունակելի․․․