Թե ինչու քանդուքարափ եղավ Մադրիդի «Ռեալ»-ը

«Սանտյագո Բեռնաբեու» մարզադաշտում հոլանդական «Այաքս»-ը ցույց տվեց, որ իրականում ավելի ուժեղ է թե՛ «Ռեալ»-ից, և թե՛ «Բարսելոնայից»: Որովհետև այդ տղաներն ավելի լավն էին, քան օրեր առաջ «Բարսելոնա»-ի տղաները: Կատալոնցիներին մի պահ հանգիստ թողնենք ու շարժվենք առաջ:

Այն, որ Սանտիագո Սոլարին վատ մարզիչ է, դրանում չենք կարող համաձայնվել, քանի որ վատ թիմին անհնար է մի քանի մասում դարձնել լավը: Սոլարին հանգիստ ու ճիշտ իր գործն անում է: Ֆլորենտինո Պերեսն ամռանը վաճառեց Ռոենալդուին, քանի որ այդ «ծերուկն» իրեն էլ պետք չէր, սակայն «ծերուկն» Իտալիայում իրենն է թելադրում:

Թիմը բերեց Կուրտուային, սակայն այս տղան, մեղմ ասած, «Ճ կլասսի» դարպասապահ է դարձել, ով միայն 4-5 խաղը մեկ մի լավ սեյվ է անում այնպես, ինչպես բակում ֆուտբոլ խաղացող դարպասապահները:

Մարսելոն Թուրինի տոմսն է առել ու սպասում է ամառվան:

Իսկոն թիմի մերժվածն է:

Մոդրիչը երևի ինքն էլ է հասկանում, որ «Ոսկե գնդակ» ստացավ միայն Աշխարհի առաջնության ժամանակ լավ հանդես գալու համար:

Կրոսն արդեն մեծ է:

Կազեմիրոն կարոտել է Զինեդին Զիդանին ու ապրում է անցյալով:

Ասենսիոն ու Վասկեսը կամաց-կամաց դառնում են Իսկոյի նման մերժվածներ:

Բեյլն ու Բենզեման Մարսելոյի նման սպասում են ամառվան ու ձանձրացել են ֆուտբոլ խաղալուց:

Դե նորեկ տղաներն էլ նորեկ են ու փորձում են «մի բան անել»:

Սարսափելի է, սակայն ներկայիս «Ռեալ»-ում լավագույնը Վինիսիուս Ժունիորն է, ով ուղղակի այնպիսի կարգի ֆուտբոլիստ է, ինչպես, օրինակ, «Սևիլիա»-ի հարձակվող Անդրե Սիլվան, պարզապես Սիլվայի PR-ով քիչ են զբաղվում:

Թիմում ֆուտբոլ շարունակում է խաղալ միայն ավագը՝ Ռամոսը, ով ապացուցում է, որ իսպանական գրանդի նվիրյալն է հոգով ու սրտով:

Ամռանն ու ձմռանը 0 տրանսֆերներ, ու այդքանից հետո մեկը սպասում էր, որ այս թիմը «Այաքս»-ին կհաղթի՞:

Իրականում այս խնդիրները սկսվեցին Ռոնալդուից: Ուզենք, թե չուզենք, սակայն պետք է ընդունենք, Ֆլորենտինո Պերեսն իր ձեռքով քանդեց այս թիմը, որն ինքն էր ստեղծել: Ու մոտավորապես 5-6 տարով Մադրիդի «Ռեալ»-ը հետ կընկնի եվրոպական գրանդ ակումբներից: Պերեսը չցանկացավ մի քանի միլիոն ավելի վճարել ու բարձրացնել Ռոնալդուի աշխատավարձը, ով պարզապես այս թիմի ոգին էր, երակը, սիրտը և ամեն ինչը: Ռոնալդուի հետ անհամաձայնությունը տարավ նաև Զիդանին, և արդյունքում հիասթափություն, կոնֆլիկտներ ու կոտրած տաշտակ:

Իրականում երեկ հենց Կրիշտիանու Ռոնալդուն ապտակեց «Ռեալ»-ին, քանի որ նույն կերպ էլ Ֆլորենտինո Պերեսն իր հետ վարվեց: Պերեսը Ռոնալդուին ապտակեց ու Մադրիդից դուրս շպրտեց, քանի որ այս «ծերուկ տղան» իրեն այլևս պետք չէր:

Դեռ մի քանի տարի շարունակ Ռոնալդուն ապտակելու է «Ռեալ»-ին:

NEWSPRESS.am Sport