Փաշինյանը մաքրում է նաև «Քեթրինի Միհրանին». տպավորիչ է

Այսօր «Ժողովուրդ» օրաթերթը տեղեկություն էր հրապարակել այն մասին, որ ԱԺ նախկին ՀՀԿ խմբակցության պատգամավոր, օֆշորային սկանդալի մեջ հայտնված գեներալ Միհրան Պողոսյանն էկզոտիկ մրգերի ներկրմամբ եւ վաճառքով զբաղվող նոր ընկերություն է ստեղծել: Խոսքը «Մրգենի» ՍՊԸ մասին է, որը, ըստ պետական ռեգիստրի, ստեղծվել է 2018թ. հուլիսի 27-ին, իսկ հիմնադիրն է Լեւոն Աթաջանյանը:

«Ժողովուրդ» օրաթերթին հայտնի է դարձել, որ «Մրգենի» ընկերությունը մրգի տեղափոխումն իրականացնում է «Քեթրին գրուպ»-ի մեքենաներով:

Այս հրապարակումը եղավ այն համատեքստում, երբ մեկ օր առաջ ՏՄՊՊՀ-ն ուսումնասիրություն հրապարակեց, թե բիզնեսում խոշորների տեսակարար կշիռը նվազել է:

Ըստ ՏՄՊՊՀ-ի ուսումնասիրության՝ ընթացիկ տարվա փետրվարի դրությամբ շաքարավազի շուկայի մասնակիցների թիվը կազմել է 75 տնտեսվարող, բանանի շուկայինը՝ 28, ալյուրինը՝ 171: Ցորենի ներկրմամբ զբաղվում է 84 տնտեսվարող: Ավելացել է նաեւ բենզինի ներկրմամբ զբաղվող տնտեսվարողների թիվը՝ դառնալով 6:

Նվազել է նաեւ բանանի շուկայում գերիշխող «Քեթրին գրուպ» ընկերության մասնաբաժինը՝ 57 տոկոսից դառնալով 30 տոկոս: Կենտրոնացվածության աստիճանի նվազում է արձանագրվել նաեւ բենզինի եւ դիզելային վառելիքի շուկաներում, որտեղ «Ֆլեշ» ընկերության մասնաբաժինը նվազել է բենզինի մասով՝ 43-ից հասնելով 29 տոկոս, իսկ դիզվառելիքի մասով՝ 51-ից դառնալով 29 տոկոս:

Պետական և հասարարական օղակներից ստացված ինֆորմացիաները վերլուծելով, կարող ենք հանգել եզրակացության, որ ոչ թե խոշորների տեսակարար կշիռն է նվազել, այլ ընդամենը վարչարարություն է փոխվել: Կարծիք կարելի է կազմել, որ խոշոր գործարար, նախկին պատգամավոր Միհրան Պողոսյանն այժմ իր բիզնեսը ոչ թե կենտրոնացնում և մեկ ՍՊԸ-ով է աշխատում, այլ տարբեր ՍՊԸ-ներ է բացում և նույն գործն անում: Պետությունն, իհարկե, հաշվում է, որ Միհրան Պողոսյանն այլևս մոնոպոլ դիրք չի զբաղեցնում, բայց չի խորանում փաստերի ուսումնասիրության մեջ, թե նույն բիզնեսով զբաղվող մյուս ՍՊԸ-ների իրական սեփականատերն ովքեր են:

Ի դեպ, ՏՄՊՊՀ նույն ուսումնասիրության համաձայն՝ Սամվել Ալեքսանյանն ու Բարսեղ Բեգլարյանը ևս մոնոպոլ դիրքում նվազեցրել են իրենց ցուցանիշները: Ստացվում է, որ կան գործարարներ, ովքեր ամուր կապով կապված են նախորդ իշխանություներին, բայց սերտ համագործակցում են նորերի հետ, իսկ այսօրվա իշխանությունը աչք փակելով նրանց գործունեության մութ կետերի վրա՝ մաքրում է նրանց անօրինական հետքը:

Տպավորիչ է, ինչ խոսք:

NEWSPRESS.am