«Կարաբալա» օպերացիան չստացվեց (տեսանյութ)

Նախորդ տարիների մարտիության շքեղությունը 2019 թվականին չկար: Երևանցիները կհիշեն, որ ամեն տարի այդ օրը մայրաքաղաքի բոլոր փողոցները զարդարվում էին ծաղիկներով ու հետաքրքիր լուծումներով: Այդ օրը կարծես ծաղկի տոն լիներ մայրաքաղաքում: Բացի այդ, քաղաքի փողոցներում շրջում էին հեծանվորդները, գեղեցիկ զարդարված կառքերով երիտասարդներն ու ծաղիկներ բաժանում բոլոր կանանց ու աղջիկներին:

Անակնկալներ էին կազմակերպվում նաև հասարակական տրանսպորտում, մետրոյում և «Զվարթնոց» օդանավակայանում, որտեղ Հայաստան ժամանող բոլոր կանայք ստանում էին ծաղիկներ: Ծաղիկներ ստանում էին նաև կին վարորդները՝ շնորհավորական բացիկներով:

Այս ամենը կազմակերպում էր Երևանի քաղաքապետարանը: Այս տարի միայն ոստիկանության ու ԱԻՆ-ի աշխատակիցները հանդես եկան փոքրիկ նախաձեռնություններով, իսկ քաղաքապետարանն անհաղորդ էր իրադարձություններին ու լուռ (այստեղ այդ պահին լարված իրավիճակ էր): 

Փոխարենը՝ Կարաբալայի դերն էր ստանձնել երկրի վարչապետ Նիկոլ Փաշինյանը՝ ձնծաղիկների իր զամբյուղով: Իհարկե, այս մտահղացումն այլընտրանքային էր, եթե հաշվի առնենք, որ նախկինում ոչ մի ղեկավար պաշտոնյա կանանց տոնին զամբյուղով ծաղիկներ չի բաժանել հասարակ քաղաքացիներին: Բայց միայն այդքանը:

Ու գուցե այս երևույթին չանդրադառնայինք, եթե իրականում նախաձեռնությունը հերթական անգամ «փիառվելու» և Փաշինյանի ընկնող վարկանիշը փոքր-ինչ բարձրացնելու հերթական անհաջող փորձը չլիներ:

Իր լայվի հենց սկզբում նա հայտարարեց, թե իբր դուրս է գալիս փողոցում կանանց ծաղիկ բաժանելու և նրանց հետ քննարկելու, թե որքանով են այսօր կանանց իրավունքները պաշտպանված: Սակայն հարկ է նկատել, որ նա իր կառավարության շենքի կողքից նույնիսկ կես քայլ չարեց՝ մտնելու ժողովրդի մեջ: Ու ծաղիկներ բաժանելու և կանանց հետ զրուցելու՝ Փաշինյանի պլանը վերածվեց ֆոտոշարքի ու սելֆիների շարքի. բոլորը նկարվում էին գովերգելով Փաշինյանին ու նրա կառավարությունը, բայց երևի մտքի մեջ մտածելով՝ դե մեռնել-ապրել կա, բա վարչապետի հետ մի հատ նկար չունենա՞նք...

Այս ֆոտոսեսիային միացավ նաև Փաշինյանի տիկինը՝ Աննա Հակոբյանը: Ի դեպ, Աննան «իքս» պահից հետևում էր ուղիղ եթերին ու հավանաբար գլխի ընկավ, որ իրավիճակը վերահսկողությունից դուրս է եկել և որոշեց, որ իր ժամը հասել է՝ պետք է գնալ ու «փրկել» ամուսնուն:

Աննայի հայտնվելուց հետո Փաշինյանը հայտարարեց, թե 5 րոպե էլ նկարվում է և վերջ:

Փաշինյանն իր լայվի վերջում խոստովանեց, որ նախաձեռնությունը չստացվեց: Եվս երկու նկար, և Փաշինյանն այս անգամ հայտարարեց, թե 3 րոպե էլ նկարվում է ու գնա... և գնաց. «Վերջ, վերջ, անջատեք ուղիղ եթերը»,-ասաց Փաշինյանը՝ արագ նստելով իր մեքենան ու փակելով չհաջողված Կարաբալայի թեման:

Ի դեպ, Փաշինյանը նաև անկեղծ զարմացավ, որ այդ պահին այդքան կին կար հրապարակում:

«Ինչ-որ միջոցառում կա՞, որ եկել եք»,- հարցեց նա, ու ոչ ոք չասաց, թե միշտ, ամեն տարի եղել են հետաքրքիր միջոցառումներ, ու իրենք, սովորության համաձայն, եկել են մասնակցելու դրան, բայց չգիտեին, որ այդ ամենի փոխարեն, այս անգամ մասնակցելու են միայն Փաշինյանի «Կարաբալա» օպերացիային: Սա ի միջի այլոց...

Իհարկե, զամբյուղով մի երկու ծաղիկ բաժանելու և կեղծ տպավորություն, իմիտացիա ստեղծելու, թե իբր ինքը տեղյակ չէ կանանց իրավունքների պաշտպանվածության մասին, ավելի լավ կլիներ, որ Փաշինյանն ուշադրություն դարձներ այդ օրը փողոցում մուրացող, ծաղիկ ու կանաչի վաճառող կանանց: Ավելի լավ կլիներ, նա բացեր կանանց կողմից իրեն ուղարկված նամակները՝ հասկանալու, թե ինչով կարող է օգնել նրանց որպես վարչապետ: Ավելի լավ կլիներ, օրինակ, բազմազավակ մայրերին կամ սոցիալապես անապահով ընտանիքների մայրերին օժանդակություն ցուցաբերեր... Եվ ի վերջո, ուշադրություն դարձներ այն կականց, ովքեր երեխաներ են մեծացնում ու չեն կարողանում նույնիսկ բնակարանի վարձը վճարել: Ի դեպ, նրանցից երկուսին հենց այդ օրը տանտերը տնից դուրս էր արել՝ բնակարանի վարձը չվճարելու համար և նրանք, անճարությունից, երեխաների հետ նստել էին քաղաքապետարանի դիմաց և խնդրում էին ինչ-որ կերպ աջակցել իրենց՝ դրսում չմնալու համար:

Իհարկե, կարելի է մի հսկայական շարք ներկայացնել, թե ինչ կարող էր անել վարչապետ Փաշինյանը, բայց քանի որ նրա օրվա միակ նպատակը զուտ «փիառվելն» էր, նա չտեսավ ո՛չ իր օգնության կարիքն զգացող կանանց, ու ոչ էլ կարդաց իրեն կանանց խնդրանքներով ուղղված նամակները:

Հասկացա՞վ արդյոք Փաշինյանը, որ այլևս լայվերն անզոր են վերականգնել իր օրեցօր ընկնող վարկանիշը, հասկացա՞վ նա արդյոք, որ այլևս մանր-մունր բաներով ժողովրդին չի կարող խաբել ու վերադարձնել նրանց հավատը, չենք գուշակում, պարզապես պետք է արձանագրել, որ Փաշինյանի համար, փաստորեն, «Կարաբալա» օպերացիան հերթական պոպուլիստական քայլն էր, որն այս անգամ, իր իսկ խոսքով, չստացվեց... 

Արմինե Մկրտումյան