Նախագիծ, որը «կօգնի» միշտ ժպտալ ու շատ բարի լինել

Ոչ վաղ անցյալում Վրաստանն օրինականացրեց մարիխուանայի օգտագործումը։ Մարիխուանայի օգտագործման ազատականացման ու օրինականացման լոբբինգ գնում է ամբողջ աշխարհում։ Կանադայում, օրինակ, նույնիսկ հաշվել են, թե տնային պայմաններում մինչև քանի թուփ աճեցնելն է ապաքրեական, իսկ քանիսը՝ քրեական կամ վարչական պատասխանատվության ենթակա։

Այն, որ տարբեր երևույթներ աշխարհում ճանաչում տալու, կամ լեգալիզացնելու համար լոբբինգ է իրականացվում, օգտագործելով տեղեկատվական և տեխնոլոգիական ռեսուրսները, որևէ մեկի համար այլևս զարմանալի չէ։ Այդպես արվեց շատ երևույթների դեպքում, և դեռ կարվի նաև ապագայում։

Ի վերջո, մարդը, որքան էլ ինքն իրեն հավատացնի, որ անխոցելի է որպես կատարյալ արարած բնության մեջ, սակայն ամենախոցելին է, քանի որ դյուրությամբ է դառնում կառավարելի՝ ինֆորմացիոն հոսքերի ազդեցությամբ, եթե իհարկե, դրա դեմ, այսպես ասած, իր իմունիտետը չի մշակել։

Հայաստանում տեղի ունեցած իշխանափոխությունից անմիջապես հետո գրեթե նախ սոցցանցային հարթակներում և ապա նաև մամուլում սկսեցին խոսել այն մասին, որ կա մտադրություն մարիխուանայի օգտագործումը օրինականացնելու։ Եվ ահա, ՀՀ Արդարադատության նախարարության Իրավական ակտերի նախագծերի հրապարակման միասնական հարթակում քննարկման է դրվել «Թմրամիջոցների և հոգեմետ (հոգեներգործուն) նյութերի մասին» ՀՀ օրենքում փոփոխություններ կատարելու մասին նախագիծ, որով առաջարկվում է օրինականացնել թմրամիջոցների և արգելված նյութերի օգտագործման օրինականացում գիտական, ուսումնական և փորձագիտական նպատակներով։

Սա բավական լուրջ մտահոգության առիթ դարձավ հասարակության որոշ շրջանակների համար, քանի որ կարծիք արտահայտվեց, որ Հայաստանում էլ է սկսվել թմրամիջոցների օրինականացման գործընթացը։ Ու թեև ՀՀ առողջապահության նախարար Արսեն Թորոսյանն ամեն կերպ հակազդում է այդ ամենին, ասելով, որ նման օրինականացման մասին խոսք գնալ չի կարող, սակայն գոնե միջազգային փորձը հաշվի առնելով, հասկանալի է, որ օրինականացման բուն պրոցեսը սկսվում է հենց այդ գիտական և այլ փուլից։

Իսկ եթե ավելի խորը նայենք հարցին, ապա այդ նախագիծը հայտնվել է քննարկման այն պատճառով, որ կա դրա իրականացման քաղաքական կամքը կամ նույնիսկ արդեն կայացված քաղաքական որոշումը։ Ստացվում է, որ փաշինյանական իշխանությունն արդեն հստակ մտադրվել է գնալ մի քայլի, որը չափազանց ծանր հետևանքներ կարող է ունենալ մեր երկրի ու ժողովրդի համար։ Ու այստեղ ամենևին կարևոր չէ այն թեզը, թե մարիխուանա ծխող մարդիկ միշտ ժպտում են ու շատ բարի են։

NEWSSPRESS.am