Դասադուլ․ ուսանողները պահանջում են վերադարձնել Արայիկ Հարությունյանի հեռացրած տնօրենին (տեսանյութ)
Երևանի տարածաշրջանային պետական համար 2 քոլեջի ուսանողներն ու դասախոսական անձնակազմն այսօր հավաքվել էին կառավարության դիմաց․ նրանք պահանջում են այսօր աշխատանքից հեռացված Կառլեն Հայրապետյանի վերադարձը։
Այսօր առավոտից նրանք դասադուլ են սկսել և եկել են կառավարության դիմաց։ Բանն այն է, որ քոլեջի նախկին փոխտնօրեն Մխիթար Պատվականյանը, ով ցուցարարների խոսքով, երազել է տնօրեն դառնալ ու չի հասել իր նպատակին, սկսել է խնդիրներ ստեղծել ներկայիս տնօրենի համար։
«Մեր տնօրենին կեղծ զրպարտությունների հիման վրա, երկու ստուգումների արդյունքում տվել են երկու նկատողություն, մարտի 12-ին տրվել է երկրորդ նկատողությունը և այսօր նրան հեռացրել են աշխատանքից»,- NEWSPRESS․am-ի հետ զրույցում ասաց քոլեջ փոխտնօրեն Կարինե Մադոյանը։
Փաստաբան, նույն քոլեջի իրավագիտության դասախոս Գարիկ Սահակյանն էլ նշեց, որ տնօրենին հեռացրել են աուդիտի եզրակացության հիմքով, այսինքն՝ կադրային խնդիրների, ինչպես նաև ֆինանսական չարաշահումների։ Նա նշեց, որ այդ չարաշահումները եղել են նախորդ օգոստոս ամսին, քրեական գործ է հարուցված, սակայն տնօրենը կամ որևէ այլ անձ դատավարական որևէ կարգավիճակ չունի։ Սահակյանը վստահ է, որ գործը կարճվելու է։
Քոլեջի ուսանողներն էլ նշում են, որ մեկ տարի ժամանակահատվածը բավարար չէ, բոլոր հարցերին լուծում տալու համար, իսկ խնդիրներ ցանկացած ուսումնական հաստատությունում կան։ Նրանց նույնիսկ չի հետաքրքրում, թե ում կնշանակեն տնօրեն, նրանք հանդիպում են պահանջում Կրթության և գիտության նախարար Արայիկ Հարությունյանի հետ և պահանջում իրենց տնօրենի վերադարձը։
Նշենք, որ այսօր առավոտյան Պատվականյանը եկել էր կառավարության դիմաց ու նախարար Արայիկ Հարությունյանին կրկին փորձում էր ներկայացնել իր խնդիրը, իսկ նախարարը տեղեկացրեց նրան, որ այդ քոլեջի տնօրենը հեռացվել է աշխատանքից։ «Ուռա՜»,- բացականչել էր ցուցարարը
Մանրամասները՝ տեսանյութում
