Մոսկվայի «խանդը» Բաքվի հանդեպ՝ դրսևորվեց հայերի հաշվի՞ն

Ռուսաստանի ԱԳ նախարարությունը իր երկրի քաղաքացիներին նախազգուշական հայտարարություն է արել, հորդորելով խուսափել Ադրբեջան այցելելուց։ Որպես հիմնավորում բերված է այն հանգամանքը, որ Ադրբեջանում, անկախ քաղաքացիությունից՝ հայ կամ հայկական արմատներ ունեցողներին թույլ չեն տալիս մուտք գործել երկիր։

Մոսկվայում սա գնահատել են որպես խտրականության դրսևորում և ասել, որ բազմիցս են նման խնդիրներ ունեցել, երբ հայազգի կամ հայկական արմատներ ունեցող ՌԴ քաղաքացիները ցանկացել են այցելել Ադրբեջան, սակայն խնդիրների առաջ են հայտնվել։ Վերջին սկանդալն այս առումով Բաքվի և Մոսկվայի միջև եղավ այս տարեսկզբին։ Նաև` անցյալ տարվա վերջին։ Նման տասնյակ դեպքեր կարելի է հիշել։ Նույնիսկ կա հատուկ վարվելակերպ՝ հեղինակված նման տխուր փորձառություն ունեցողների կողմից, թե ինչպես պետք է պահես քեզ Բաքվի օդանավակայանում, մինչ հետ կդարձնեն քեզ Ռուսաստան, որտեղ հստակ խորհուրդ է տրվում գրպաններն ամուր պահել, որպեսզի հանկարծ ադրբեջանցի իրավապահները կամ մաքսային ու անվտանգության համակարգի ծառայողները գրպանում թմրանյութ «չհայտնաբերեն»։

Պատահականության սկզբունքով թե ոչ՝ ՌԴ ԱԳՆ այս հայտարարությունը հրապարակվեց այն պահին, երբ ղարաբաղյան կարգավորման հետ կապված՝ պաշտոնական Երևանը բավական հետաքրքիր հայտարարություններ էր արել արդեն Ստեփանակերտից, և կարելի է ասել, ընթանում էր այդ հայտարարությունների «մարսման պրոցեսը»։ Շատերն այս ալիքի վրա, Մոսկվայից ազդակ համարեցին սա, ի աջակցություն հայկական կողմի։

Սակայն, իրականությունը մի փոքր այլ է։ Բանն այն է, որ օրերս Վրաստանի պաշտպանական գերատեսչությունը հայտարարություն էր տարածել Վրաստանում կայանալիք ՆԱՏՕ-ի զորավարժությունների մասին, որտեղ մասնակցող երկրների շարքում նաև Ադրբեջանն է հիշատակված։ Բաքուն էլ հաստատել է իր մասնակցությունը։ Այդ վարժանքներին, Հայաստանը օրինակ, կարծես թե չի մասնակցում, թեև հայերին ավելի, քան ադրբեջանցիներին Մոսկվան մեղադրում է արևմտամետության մեջ։ Ու ակամա կարելի է մտածել՝ իսկ գուցե Մոսկվան Բաքվի հանդեպ իր «խանդը» դրսևորեց ի հաշիվ հայերի...

NEWSPRESS.am