«Իհարկե, լավ չեն արել, որ քանդել են»․ Կենտրոնի թաղապետը՝ քանդվող ու կառուցվող շենքերի մասին

Եթե Օպերայի տարածքի սրճարանները քանդելու նպատակը թամանյանական Երևանը վերադարձնելու միտումն էր, ապա ինչո՞ւ քաղաքապետարանը թույլ տվեց քանդել Թամանյանի շրջանում կառուցված շենքը։ Այս հարցը լրագրողներն ուղղեցին Արաբկիր վարչական շրջանի ղեկավար Վիկտոր Մնացականյանին՝ մատնանշելով մասնավորապես վերջերս քանդված Խորենացի 13 հասցեում գտնվող շենքը։

«Իհարկե լավ չեն արել, որ քանդել են, բայց քանդել են, որ վերականգնեն, քանի որ հին շենք էր»,-եղավ Վիկտոր Մնացականյանի պատասխանը։ Նա նկատեց նաև, որ հին քարերից պահպանվել են։

Իհարկե, այստեղ հարց է առաջանում նաև, թե ի՞նչ տեսքով են այդ քարերը պահպանվել, եթե ճակատային մասի նախշազարդ քարերն ամբողջովին ջարդ ու փշուր են եղել, բայց Մնացականյանը դրա պատասխանը չգիտի։ Փոխարենը գիտի, որ քաղաքն ունի «կնճռոտ մասեր» և տարեցտարի քաղաքն այլ տեսք պետք է ստանա։

«Երբ Թամանյանը նախագծել է քաղաքը, այն ժամանակ ընդամենն էստեղ մի քանի տուն կար, բայց մենք պետք է փոփոխենք ու ավելացնենք, չէ՞»,- ասաց Մնացականյանը։

Այստեղ երկրորդ դիտարկումը․ ավելի լավ է Վիկտոր Մնացականյանն այս հարցն ուղղեր հենց ինքն իրեն ու նաև քաղաքապետարանին։ Քանի որ այդ իրենք են շահարկել Թամանյանի անունը՝ սրճարանները քանդելու համար։

Նույն տրամաբանության մեջ ցանկացած մեկը ու հատկապես սրճարանների սեփականատերերն ու աշխատողները և նաև նրանք, ովքեր շատ հաճախ օգտվել են այդ սրճարաններից ու դա իրենց դուր է եկել, կարող են հարցնել՝ բա չէի՞ն սարքել, որ քանդեցիք․ բա ձևափոխել էին, հաճելի մթնոլորտ էին ստեղծել, աշխատատեղ էին ստեղծել՝ ինչո՞ւ քանդեցիք․․․

Վիկտոր Մնացականյանը հավաքել էր Երևանի մյուս վարչական շրջանների ղեկավարներին ու համեմատում էր Կենտրոնը մյուս շրջանների հետ ու վստահեցնում, որ Կենտրոնում ամեն ինչ դժվար է։

Հարցին, թե ի՞նչ է լինելու Օպերայի տակ գտնվող ավտոկայանատեղու հետ, եթե տարածքը պետք է կանաչապատվի, Մնացականյանն արձագանքեց՝ կառուցողը թող այդ մասին ժամանակին մտածեր։ Միևնույն ժամանակ նա գիտակցում է․ «Պետությունը խոհեմ պետք է լինի, որպեսզի ոչ մի կողմը չտուժի»։