Երկխոսությունը նոր չի սկսվել․ Փաշինյանը՝ Արցախի խնդրի մասին

Երկխոսությունն սկսվել է Դուշանբեում, շարունակվել է Սանկտ Պետերբուրգում, Դավոսում, հաջորդը չգիտեմ՝ որտեղ կլինի: Մամուլի ասուլիսի ժամանակ անդրադառնալով Արցախի խնդրի կարգավորմանը՝ հայտարարեց վարչապետ Նիկոլ Փաշինյանը։ Նա նկատեց, որ երկխոսությունը նոր չի սկսվել:

«Մենք չենք պատկերացնում ռեժիմ, որտեղ կողմերից մեկը կասի` ես երկխոսությունից հրաժարվում եմ, դա տրամաբանական մոտեցում չի լինի: Բնականաբար, մենք էլ երկխոսությունից չենք հրաժարվի և երկխոսության ընթացքում սեղանին կդնենք մեր փաստարկները և ուշադիր կլսենք մեր գործընկերների հակափաստարկները: Կարծում եմ` կառուցողական և արդյունավետ լուծումը կամ շարունակությունը հենց այս տրամաբանության շրջանակում պետք է լինի»,- ասաց Փաշինյանը։

Ինչ վերաբերում է Արցախին բանակցային սեղանին վերադարձնելու հարցին, ապա Փաշինյանը նկատում է, որ սա մեր կողմից ո՛չ քմահաճույք է, ո՛չ նախապայման:

«Այն, ինչ հրապարակային ասվում է, նորություն չէ ո՛չ Մինսկի խմբի համանախագահների, ո՛չ ադրբեջանցի մեր գործընկերների համար: Այս ընթացքում բոլոր շփումների ժամանակ այդ թեման, այդ օրակարգը ես առաջադրել եմ»,- ասաց վարչապետը՝ հավելելով, որ բանակցությունը բանակցություն է նրանով, որ իրար լսում են։

Փաշինյանը նկատեց նաև, որ Հայաստանն այդ լսելու կարողությունն ունի, ինչը ակնկալում են նաև Ադրբեջանի կողմից։

«Այնտեղ, որտեղ մեր գործընկերները մեր դիրքորոշումը կարող են գնահատել չափից կարծր, մենք կարող ենք այդ դիրքորոշումը մեղմացնել, բայց նույն ակնկալիքն ունենք մեր գործընկերներից, այլապես խոսակցությունը պարզապես տեղի չի ունենա»,- ասաց Փաշինյանը: