Ինչի՞ց է սարսափում Շիրխանյանը

Թավշյա հեղափոխությունից հետո Սպարապետ Վազգեն Սարգսյանի անունն այնքան շատ չէր հոլովվել մամուլում, որքան մարտ ամսին, և դա բացարձակապես կապ չունի նրա հետ, որ այս ամիս՝ մարտին, լրացավ սպարապետի 60 ամյակը:

Այդ օրը, ինչպես սպասելի էր, Նիկոլ Փաշինյանը շատ պասիվ գտնվեց և դրա պատճառն այն է, որ հենց Վազգեն Սարգսյանն էր, որ գահընկեց արեց Փաշինյանի կնքահորը՝ Լևոն Տեր-Պետրոսյանին՝ Արցախյան տարածքներն ադրբեջանցիներին տալու՝ նրա դավաճան գաղափարի համար:

Վազգեն Սարգսյանին սկսել են գրեթե ամեն օր հիշել մամուլում հատկապես մի քանի հոգի՝ Վահան Շիրխանյան, Անդրանիկ Քոչարյան, Գագիկ Ջհանգիրյան: 
Հենց այս մարդիկ են այսօր քաղաքական առևտրի ելել՝ շահարկելով Սպարապետի անունը՝ քաղաքական դիվիդենտներ են ստանալու համար:

Իհարկե, այդ երեքի առանցքում Վահան Շիրխանյանն է, ում բաց նամակը պարզապես դարձավ կարևոր խաղաթուղթ ՀՔԾ-ի համար, իսկ հասարակության մոտ ընկալվեց որպես Ռոբերտ Քոչարյանի դեմ հերթական «բոչկա գլորոցին»:

Հիշեցնենք՝ Հայաստանի երկրորդ նախագահ Ռոբերտ Քոչարյանին ուղղված բաց նամակում Վահան Շիրխանյանը, մասնավորապես, գրել է․ «1998թ. 30-ը մարտի, նախագահական ընտրությունների 2-րդ փուլ։ Բացառապես Վազգեն Սարգսյանի խոսքին տրված 27 տոկոս քվեն դարձրիր քեզ համար 59 տոկոս և քեզ հռչակեցիր ՀՀ նախագահ։ Իսկ 73 տոկոս ստացած Կարեն Դեմիրճյանին «մեծահոգաբար» տվեցիր 41 տոկոս՝ խոստանալով նաև վարչապետի պաշտոնը՝ Վազգենի պահանջով։ Եվ, իհարկե, խաբեցիր, ինչպես միշտ»:

Նրա այս նամակն ի գիտություն է ընդունվել ՀՔԾ-ում, որտեղ 1998 թվականի ընտրությունները կեղծելու վերաբերյալ նյութեր են նախապատրաստվում:

Ու ստեղծվել է մի վիճակ, որ Քոչարյանի մեղադրանքներն ավելանում են բանտում տարիներ անցկացրած նախկին պաշտոնյայի նամակի շնորհիվ և չի բացառվում, որ լինի նոր քրեական գործ՝ արդեն 1998 թվականի ընտրությունները կեղծելու վերաբերյալ:

Երբ հիշում ես, որ Վազգեն Սարգսյանն ու Կարեն Դեմիրրճյանն արդեն մահացած են, հասկանում ես, որ պատվերի կենտրոնում միայն Ռոբերտ Քոչարյանն է, ում ուսերին էլ կբարդվի Շիրխանյան Վահանի նամակն՝ իր ողջ ծանրությամբ:

Տպավորություն է, որ Շիրխանյանը սարսափում է մի բանից, ինչի համար էլ լծվել է Քոչարյանին բանտում պահելու գործին:

NEWSPRESS.am