Փաշինյանի կառավարությունը քաղաքացու հանդեպ սոցիալական պատասխանատվությունից իրեն ազատված է համարում

Հայաստանի տարածքային կառավարման և զարգացման նախարար Սուրեն Պապիկյանը իր հարցազրույցներից մեկում բավական ուշագրավ հայտարարություններ է արել։ Նախ, հայտնի է դարձել, որ նախորդ իշխանությունների օրոք նախատեսված է եղել փոփոխություններ կատարել ՀՀ վարչատարածքային բաժանման մեջ։ Մասնավորապես, նախատեսված է եղել 10 մարզի փոխարեն ունենալ 5 մարզային միավոր, փոքր թվով աշխատակազմով։

Հիշեցնենք, որ ՀՀ-ում ներկայումս եռաստիճան վարչատարածքային կառավարման համակարգ է գործում՝ կառավարություն-մարզ-համայնք։ Ընդ որում՝ համայնքը կարող է ինչպես մեկ, այնպես էլ մի քանի բնակավայրերից բաղկացած լինել։ Հիշեցնենք նաև, որ Հայաստանում ներկայումս շարունակում է ընթանալ համայնքների խոշորացման ծրագիրը։ Նոր իշխանությունները կարծես թե այս ուղուց հրաժարվել են և որդեգրել այլ ճանապարհ։ Պահպանելով հանդերձ հիմնական գիծը՝ ունենալ փոքր, բայց արդյունավետ աշխատող աշխատակազմեր մարզպետարաններում, ներկայիս իշխանությունները որոշել են պահպանել 10 մարզի կառուցվածքը, ասել է թե՝ 10 մարզպետարանները, սակայն դրանով հանդերձ, իրականացնել այդ նույն մարզպետարանների աշխատակազմերի մինչև 40 տոկոսի կրճատում։

Իր հարցազրույցում Պապիկյանը նկատել է, որ ապագայում կա նպատակ վարչատարածքային կառավարումը դարձնել երկաստիճան, այսինքն՝ կառավարություն-համայնք, իսկ մարզպետարանները վերածել զարգացման տարածքային կենտրոնների, պահպանելով հանդերձ, սակայն կարևոր մի գործառույթ, կապված պատերազմական իրավիճակում թիկունքային ապահովման հետ։

Մարզերում, որտեղ գործազրկության մակարդակը շատ ավելի բարդ է, իսկ սոցիալական մռայլությունը շատ ավելի խիտ, այս քաղաքականությունը կարող է հանգեցնել սոցիալական ցնցումների, որովհետև ամեն մի փակվող աշխատատեղը մարզում դա մեկ ընտանիքի պոտենցիալ կերպով առանց օրվա հացի թողնել է նշանակում։ Սակայն կարծես թե սա այնքան էլ չի հուզում նոր իշխանություններին, և նրանք որոշել են իրականացնել մի ծրագիր, որը բոլոր կառավարությունների օրակարգում էլ եղել է, սակայն հաշվի են առնվել պետության՝ իր քաղաքացիների հանդեպ ունեցած սոցիալական պատասխանատվությունը, երկրի ընդհանուր սոցիալ-տնտեսական վիճակը և այլ պարամետրեր ու չի իրականացվել պետական ապարատի օպտիմալացման ծրագիրը, հասկանալով թե ինչի կարող է դա հանգեցնել։

NEWSPRESS.am