«Պարոն Փաշինյան, հարցը տալիս եմ Հայաստանի ահռելի պարտքի մասին՝ ժպտում եք»․ Ուրիխանյան

ԱԺ նիստի ժամանակ «Բարգավաճ Հայաստան» խմբակցության պատգամավոր Տիգրան Ուրիխանյանը վարչապետ Նիկոլ Փաշինյանին հարցրեց արտաքին պարտքի և հնարավոր սպառնալիքի մասին։

Նրան արձագանքելով՝ Փաշինյանը ծիծաղեց և նկատեց, որ պետք չէ այդ հարցը նման թախծալի ձայնով տալ, հատկապես որ այն սպառնալիք չէ Հայաստանի համար։

Փաշինյանի պատասխանն այնքան էլ չգոհացրեց պատգամավորին։

«Պարոն Փաշինյան, Դուք շատ լավ գիտեք իմ հարգալից վերաբերմունքի մասին․ հարցը տալիս եմ Հայաստանի ահռելի պարտքի մասին՝ ժպտում եք, հետո ասում եք, թե թախծոտ ձայնով․ ԱԺ կանոնակարգը չի կանոնակարգում պատգամավորի ձայնային ելևէջները։ Բա պարտքից եմ հարցնում, բյուջեի կեսից շատ պարտք ունենք մարելու, բա թախիծ ա, բա ի՞նչ ա, բա դա լուրջ հարց ա, և, այո՛, ես մտահոգ եմ»,- նկատեց պատգամավորը։

Նա հիշեցրեց Փաշինյանին, որ նման թախծոտ հարցեր տվել է բոլոր իշխանություններին ու կառավարության ղեկավարներին՝ ում հանդիպել է։ Ավելին, նա Փաշինյանին հիշեցրեց, որ այդ հարցերն իրենք միասին են ուղղել իշխանությանը։

Պատգամավորը նկատում է, որ գիտեն՝ վարկը ծրագրավորված է, բայց միևնույն ժամանակ մտահոգ է՝ խնդիրներ կլինե՞ն, թե՞ ոչ։

Արձագանքելով Ուրիխանյանին՝ Փաշինյանը կրկին ծիծաղեց ու նկատեց, որ չի ցանկացել վիրավորել, այլ ցանկացել է միայն տրամադրություն փոխել։

«Էն հարցը, որ միշտ եղել է, թե պարտք ենք, ո՞նց ենք տալու, հիմա այլ է։ Մենք չունենք փողի խնդիր, ունենք գաղափարի և կամքի խնդիր։ Եթե որևէ խնդիր մենք փորձենք լուծել այլ դաշտում՝ փոսն ենք ընկնելու»,- ասաց Փաշինյանը։