Փաշինյանը լվացքի մեքենայի պարքտը չի «փակվել», Միրզոյանն էլ «սև ցուցակում» է (տեսանյութ)
«Մեր տանը ինչ կա` լվացքի մեքենա, սառնարան, ամեն ինչ վարկով ենք առել»: Այսօր ԱԺ ամբիոնից հայտարարեց ՀՀ վարչապետ Նիկոլ Փաշինյանը` խոսելով սպառողական վարկերի մասին:
Նա չէր դժգոհում, որ վարկեր ունի, նա պարզապես փորձում էր վստահեցնել, որ բանկերը շատ հարմար վարկեր են առաջարկում։
«Ամիսն ընդամենը 6000 դրամ վճարելով՝ ձեռք ես բերում լվացքի մեքենա: Ինչու միանգամից 300 000 դրամ վճարես, եթե կարող ես ամիսը 6000 դրամ վճարելով լվացքի մեքենա գնել»,- ասաց Փաշինյանը։
Նա, ոչ այնքան վստահ, բայց հայտարարեց, որ իր լվացքի մեքենայի վարկը դեռ չի փակվել։
«Եթե չեմ սխալվում, մեր լվացքի մեքենայի վարկը մինչև հիմա չենք վերջացրել, մի 4 տարի առաջ ենք գնել»:
Վարչապետի ուրախ տրամադրությունը ոգևորեց նաև ԱԺ նախագահ Արարատ Միրզոյանին և նա անկեղծացավ, որ հայտնվել է «սև ցուցակում»։
«Ես այն օրը գնացի, որ հեռուստացույց վերցնեմ, այն էլ ինձ ապառիկ չտվեցին, հարկադիրը կալանք էր դրել իմ հաշիվներին»,- ասաց նա:
Նրանց անկեղծությունն ԱԺ դահլիճում գնահատվեց ծիծաղով։
