Ի՞նչ կապ ունի Օպերայի տնօրենի հարցը. իմքայլական պատգամավորները եկել էին խոսելու Արցախից, բայց դժգոհ հեռացան

Գուցե Կոստանտին Օրբելյանն ավելի լավ է զբաղեցնի իր 3 պաշտոններից մեկը, որը գտնում է կարևոր: Այսօր՝ ապրիլի 1-ին, ԱԺ ճեպազրույցի ժամանակ, այսպես արձագանքեց «Իմ քայլը» խմբակցության պատգամավոր Անդրանիկ Քոչարյանը, լրագրողների հարցին, թե ինչպե՞ս է իշխող կուսակցության խորհրդարանական թևը վերաբերվում Երևանի օպերայի և բալետի ակադեմիական թատրոնի տնօրեն Կոնստանտին Օրբելյանի ազատման որոշմանը:

«Եթե ժամանակին պարոն Օրբելյանին հրավիրել են Հայաստան` մշակութային կոնկրետ խնդիր լուծելու, նա այդ 3 պաշտոններից մեկով էլ կարող է այդպիսի մեծ խնդիր լուծի: Մյուս երկուսում կարող են լինել այլ մարդիկ, և պարոն Օրբելյանը գուցե միակը չէ, որ կարողա է ամբողջացնել այդ 3 խնդիրները միաժամանակ»,- ասաց իմքայլական պատգամավորը:

Նա առհասարակ զարմացավ, թե ի՞նչ կապ ուներ Կոնստանտին Օրբելյանի ազատման հարցը՝ իրենց Արցախ կատարած այցի հետ: Նա հիշեցրեց, որ հանդիպման են հրավիրել խոսելու հենց Արցախ կատարած այցի մասին, որը, Օպերայի տնօրենի հարցից ավելի կարևոր է:

Լրագրողների հարցին, թե իրենք իրավո՞ւնք չունեն այլ հարցեր տալու՝ իմքայլական պատգամավորները պատասխանեցին, որ հարցեր կարող են տալ, բայց իրենց չեն պատրաստվում պատասխանել:

«Արցախյան մեր այցը, որտեղ այնքան կարևոր խնդիրներ էին քննարկվել, ոնց որ ձեզ չհետաքրքրեց»,- լրագրողներին ասաց Անդրանիկ Քոչարյանը:

Վերջիններիս, լրագրողների հետ հանդիպումը չգոհացրեց. նրանք դժգոհ հեռացան:

Հիշեցնենք, որ այսօր արտիստները բողոքի ակցիա էին կազմակերպել կառավարության դիմաց՝ պահանջելով Նազենի Ղարիբյանի հրաժարականը և Կոստանտին Օրբելյանի վերադարձը: