Նազենի Ղարիբյանն Օրբելյանի հեռացման որոշումը կայացրել է կառավարության հանձնարարականով (տեսանյութ)

Ես կատարում եմ մեր կառավարության վարած քաղաքականության հիմքում ընկած աշխատանքը: Այս մասին «Հանրային» ՀԸ-ի եթերում հայտարարեց Մշակույթի նախարարի պարտականությունները կատարող Նազենի Ղարիբյանը՝ անդրադառնալով Օպերայի թատրոնի տնօրեն Կոնստանտին Օրբելյանին աշխատանքից ազատելու հարցին:

Նա վստահեցրեց, որ ամեն օր չի քնում՝ մտածելով, որ առավոտյան արթնանա և սեփական նախաձեռնությամբ ինչ-որ մեկին ազատի աշխատանքից, նա պարզապես կատարում է կառավարության հանձնարարականը:

«Բա գիտեք՝ ինչպե՞ս ենք մենք աշխատում, դա ես միայնակ չեմ անում: Կառավարությունից մեզ տրվել են հանձնարարականներ, որոնք մենք, արդեն 2 ամիս է՝ իրականացնում ենք: Նման հանձնարարականներ բոլոր նախարարություններն են ստացել»,-ասաց Ղարիբյանը:

Այն, որ արդեն մշակութային ոլորտում ինքն անընդունելի է և մշակութային շատ գործիչներ պահանջում են իր հրաժարականը, Նազենի Ղարիբյանին չի կաշկանդում:

«Այդ ամենը կապված է խոտան աղմուկի հետ, որն իրարանցում է առաջացրել»,-ասաց Ղարիբյանը՝ ընդգծելով, որ նկատի ունի ֆեյք օգտատերերին ու այն մարդկանց, ովքեր սխալ տեղեկատվություն են դաշտ նետում:

Ղարիբյանն իր այն համոզմունքին է, որ Օրբելյանն անօրինական է զբաղեցնում տնօրենի պաշտոնը և չի կարծում, որ նրա համար պետք է օրենք փոխել: Նա չի բացառում նաև այն, որ միգուցե այդ օրենքն այն ժամանակ հարմարեցրել են հենց նրան՝ տնօրենի պաշտոնում նշանակելու համար:

«Եթե մենք հիմա մի մարդու համար օերնք փոխենք՝ կնմանվենք նախկին իշխանությանը»,-ասաց Ղարիբյան Նազենին:

Նա չի կարծում, թե որևէ մեկ այլ մարդու տնօրենի պաշտոնում նշանակելու դեպքում կարևոր է կոլեկտիվի կարծիքը:

«Ես պարտավոր չեմ հարցնել կոլեկտիվի կարծիքը, թե ում են ուզում տեսնել տնօրենի պաշտոնում: Ես իրենց կարծիքը հաշվի չեմ առել, քանի որ իրենց գործը տնօրենի հետ չի լինելու: Դուք ո՞նց եք պատրկերացնում, ես գնայի հարցնեի, իրենք էլ ասեին՝ չէ՛, մենք Օրբելյանին ենք ուզում, ես էլ ասեի՝ չէ՛, օրենք է խախտվել ու միևնույնն է Օրբելյանին պետք է հանել»,-իրավիճակն այսպես նկարագրեց Ղարիբյանը: