Գյումրին կարող է տուրիստական այցեքարտ լինել, եթե ունենա նորմալ ճանապարհներ

Նիկոլ Փաշինյանը երեկ Գյումրիում էր։ Նպատակը Հանրապետության երկրորդ քաղաքի տուրիստական ներուժին, տնտեսական ենթակառուցվածքներին ու հնարավորություններին ծանոթանալն էր։ Պատկերն, ինչ խոսք, չափազանց մտահոգիչ է ու ծանր։ Աղետից 31 տարի անց դեռ Գյումրիում կան հարյուրավոր վագոն-տնակներ, իսկ փողոցների վիճակը պարզապես կատաստրոֆիկ է, թեև տեղի իշխանությունները օտարերկրյա ֆինանսավորմամբ փորձում են կարգի բերել փողոցները, բայց քանի պրոցեսն ընթացքի մեջ է, տուժում է շարքային գյումրեցին՝ ցեխ ու կեղտ տրորելով փողոցներում կամ էլ եթե չորային է՝ փոշու ամպերի դեմ մաքառելով։

Ուշագրավ է, որ գյումրեցիները երկրի վարչապետին դիմավորել էին ոչ թե նրանով հիանալու, գովեստի խոսքեր շռայլելու, կամ էլ այսպես կոչված թավշյա հեղափոխության մասին ժամերով ճառեր լսելու համար, այլ իրենց խնդիրները ներկայացնելու։ Պետք է արձանագրել, որ գյումրեցուն խաբելը հեշտ չէ։ Գյումրին ու գյումրեցին Երևանից քիչ է կախված։ Մարդիկ այստեղ իրենց օրակարգն ունեն, իրենց պատկերացումները իրերի դրության մասին։ Մեծ հաշվով միևնույնն է՝ իշխանության ղեկին Նիկոլն է, Սերժն է, Պողոսը, թե Պիղատոսը։ Միևնույնն է, քաղաքում կյանքը դրական լուրջ տեղաշարժեր չի արձանագրում։ Նախկինի նման չկան աշխատատեղեր, չկա զարգացում, որը իրական կերպով շարքային գյումրեցին կզգար իր մաշկի վրա, բարեկեցության աճով, իսկ մնացածը պարապ խոսակցություններ են։ Պատահական չէ, որ վերջին ԱԺ արտահերթ ընտրություններին մշակութային մայրաքաղաքն ու հումորի հայրաքաղաքը ամենաքիչ մասնակցության ցուցանիշն ունեցավ, ազդակ տալով, որ կասկածում է իշխանության եկածներին ու այդ կերպ իր պասիվ դժոգհությունը հայտնեց։ Ընդ որում, դժգոհությունները հիմնավորված են առավել քան։

Եթե ուշադիր ուսումնասիրենք, Գյումրին մի շարք հարցերում ունի Հանրապետությունում եզակի առավելություն։ Նախ, քաղաքը ՀՀ տարածքում միակն է, որ իր վրա կրում է 19-րդ դարի վերջի ու 20-րդ դարի սկզբի ճարտարապետական կնիքը և այս առումով կարևոր է տուրիզմի համար։ Բացի այդ, Հանրապետության միակ քաղաքն է, որ քաղաք է եղել նաև ցարական տիրապետության շրջանում՝ բառի իսկական իմաստով, ու կարող է տուրիզմի համար 19-րդ դարի վերջի ու 20-րդ դարասկզբի քաղաքային կոլորիտի և կենցաղի համար լավագույն տուր-ուղին հանդիսանալ։ Մարզն, առհասարակ, բավական հարուստ է պատմաճարտարապետական կոթողներով, որոնք սկսվում են Կամսարականների շրջանից, հասնում ուշ Բագրատունիներ և միջնադարի մյուս շերտեր։ Կան նաև նախաքրիստոնեական կոթողներ։

Սրանք միայն տուրոլորտի մասով, սակայն սրա հետ մեկտեղ՝ չկան նորմալ ճանապարհներ։ Ամենամեծ խնդիրը ճանապարհներն են, որովհետև որևէ տուրիստ Գյումրի պետք է հասնի ճանապարհներով, որոնք գոնե նվազագույն կերպով համապատասխանում են միջազգային ստանդարտներին։ Իսկ քանի չկան ճանապարհներ՝ քաղաքը պարզապես կշրջանցվի՝ տուրիստական ուղղություններից դուրս մնալով։

NEWSPRESS.am