Եթե դու դրոշը քո նեխած կոշիկներում ես կրում, ի՞նչ պետք է անի շարքային աշխատակիցը

Այսoր ՀՀ վարչապետ Նիկոլ Փաշինյանը Պետական եկամուտների կոմիտեի նախագահ Դավիթ Անանյանի ուղեկցությամբ այցելել է ՊԵԿ ստորաբաժանումներ:

Ավտոմաքսատանը շրջայցի ընթացքում Նիկոլ Փաշինյանը զերծ չի մնացել ամբոխահաճո խոսք ու զրույցից և այնքան է իջեցրել իր զբաղեցրած պաշտոնի կալիբրը, որ սկսել է տեղում հրամայել մաքսատան շարքային աշխատողներին աշխատանքից հեռացնել, իբրև թե՝ դրոշը գցած էր գետնին: Եթե, օրինակ, դրոշն իր տեղում լիներ՝ մաքսատան բոլոր խնդիրները լուծվա՞ծ կլինեին:

Ցավալի է, բայց ունենք երկրի ղեկավար, ով մտածում է միայն այսրոպեական փառքի մասին, իր պարագայում՝ մի քանի քոմենթ ավել ստանալու և ԶԼՄ-ների առաջին էջերում լինել, ոչինչ ավելին, առավել խորը փիլիսոփայություն պետք չէ փնտրել նրա արարքներում: Հակառակ դեպքում, նման մտածողության տեր մարդն իրեն թույլ չէր տա Հայաստան ժամանած Կանադայի վարչապետ Ջասթին Թրյուդոյին հայկական դրոշի մոտիվներով գուլպա նվիրել:

Եթե դու այն քո նեխած կոշիկներում ես կրում, ի՞նչ պետք է անի 120.000 դրամ աշխատավարձով աշխատող շարքայինը, բնականաբար՝ անտարբեր կլինի դրոշի նկատմամբ և հարգանք չի տարածի դրա հանդեպ: Եվ, ի վերջո, հարգանքը խիստ հարաբերական է: Եթե պետությունում վարչապետը կարող է չհարգել իր երկրի օրենքը և շարքային աշխատակցին ազատել աշխատանքից՝ շրջանցելով իրավական նորմը, ապա նա ինչպե՞ս կհարգի երկրի սիմվոլը:

Ի դեպ, պետության սիմվոլ է նաև ղեկավարը: Նրա հանդեպ հարգանքը ևս պետք է լինի բարձր մակարդակի, սակայն արի ու տես՝ սելֆիամանիայով տառապող, ամբողջ օրը ֆեյսբուքում թրև եկող, ստատուսներ ու բանաստեղծություններ ձոնող վարչապետին այդքան էլ չեն հարգում, որ նրա ներկայությամբ անգամ լեզվակռվի են բռնվում: Ինչո՞ւ: Որովհետև վարչապետն իր դիրքում չէ և չի կիսում ժողովրդի հոգսը:

Լուծվե՞ց արդյոք մաքսատան խնդիրները, պետք է հասկանալ վաղը՝ այցելելով նույն վայր և հերթի մետրը չափելով:

Հ.Գ. Ձիգ նստեք Ալիևի կողքին:

NEWSPRESS.am