Հեռուստացույցը միացնում ես, ժարգոն, մուննաթ, գողական՝ չի կարելի․ Արագած Ախոյան

Մի շարք ակտիվիստներ և քաղաքական գործիչներ բողոքի ակցիա են կազմակերպել։ Նրանք Հանրային հեռուստաընկերության ղեկավարությունից բացատրություն են պահանջում՝ ապրիլի 5-ին ԱԺ լսումների ժամանակ տրանսգենդերի ելույթը Հ1-ով հեռարձակելու համար:

Ակցիան լուսաբանում էին տարբեր լրատվամիջոցներ, որոնց մեջ էր նաև Հ1-ի հեռուստալրագրողը։ Վերջինս նկատեց, որ իրենց հեռուստաընկերության եթերում այդ ելույթը չի ցուցադրվել, ինչին Վահագն Չախալյանն արձագանքեց, թե եթե զրպարտում են՝ կարող են դիմել դատարան։

ԱԺ նախկին պատգամավոր Արագած Ախոյանն էլ լրագրողների հետ զրույցում նկատեց, որ շատ մասնագետներ ասում են, թե իբր համասեռամոլությունը ո՛չ թե հիվանդություն է, այլ ընտրություն։

«Մարդիկ էլ կան թմրանյութն են ընտրում, հիմա իրենց մասին էլ ասենք՝ նարկոմանների կամ հանցագործների համայնք է ձևավորվո՞ւմ: Այս ամենի մեջ խառն է Սորոսի մատը, ԵՄ-ի մատը»,- ասաց Ախոյանը։

Նա նկատեց, որ հասարակությանը փչացնում են նաև հեռուստատեսությամբ ցուցադրվող անմակարդակ սերիալները։

«Պատգամավոր եղած ժամանակ բազմիցս ելույթ եմ ունեցել և ասել, որ հարկավոր է պայքարել դրա դեմ, որովհետև չգիտենք, թե որ ալիքը միացնենք, որ մեր երեխաները նայեն: Նախկինում մենք դաստիարակվել ենք հեքիաթներով, չարի հանդեպ բարու հաղթանակով, իսկ այսօր հեռուստացույցը միացնում ես՝ ժարգոն, մուննաթ, գողական: Հետո ասում են՝ ժողովուրդն էս ա նայում: Լսեք, միգուցե այլ ֆիլմեր ցուցադրենք, ժողովուրդը նայում է: Չի կարելի»,-ասաց նա:

Ախոյանի գնահատմամբ՝ դրանք էժանագին նյութեր են, որոնցից պետք է հեռու մնալ։