Երկու ստախոս ինքնակայանում են Տարոն Մարգարյանի հաշվին (ֆոտո)

Արդեն մի քանի օր է՝ քաղաքապետարանի տարբեր մանր ու միջին չինովնիկներ իրենց տարատեսակ մեդիաօղակներով տարածում են տեղեկություն, թե Երևանի քաղաքապետարանի աշխատակազմի մշակույթի վարչության նախաձեռնությամբ 2019 թվականին հիմնադրվել է «Երևան» պատանեկան սիմֆոնիկ նվագախումբը:

Տարածում են նաև տեղեկություն, թե նվագախումբը բաղկացած է Երևանի քաղաքապետարանի ենթակայությամբ գործող 25 երաժշտական և արվեստի դպրոցների շուրջ 120 աշակերտներից՝ սիմֆոնիկ նվագածության երաժշտական գործիքների` գործնականում ամբողջական ներկայացվածությամբ:

Հրաշալի նախաձեռնություն, փառահեղ գաղափար, կարծես քաղաքապետարանը մշակույթի զարգացման համար ջանքեր է թափում, բայց ցավն այն է, որ ստախոսներից բաղկացած թիմը փորձում է յուրացնել նախորդների աշխատանքը և ներկայացնել որպես իրենց մտքի թռիչք, սակայն google որոնողական համակարգում պարզ որոնման շնորհիվ կարելի է գտնել տեղեկություն, որ այս նախաձեռնությունն ամենևին էլ Մարությանին չի պատկանում, ոչ էլ, առավել ևս, նրա «փոխ» Տիգրան Վիրաբյանին:

Նրանց կողմից գողացված աշխատանքն իրականում նախաձեռնել է Տարոն Մարգարյանը իր քաղաքապետ լինելու ժամանակ: Քաղաքապետարանի կայքում դեռևս 07.07.2017 թվականին կարդում ենք՝ Քաղաքապետ Տարոն Մարգարյանը ներկա է գտնվել պատանի մենակատարների գալահամերգին:

Ապա 16.06.2018-ին՝ Քաղաքապետ Տարոն Մարգարյանը ներկա է գտնվել «Երևան» պատանեկան սիմֆոնիկ նվագախմբի և միացյալ երգչախմբի համերգին:

Ի դեպ, յուրացրած գաղափարը, որով հատկապես պարծենում է փոխքաղաքապետ Տիգրան Վիրաբյանը, գոնե կոսմետիկ փոփոխությունների չի ենթակվել, ներկայացվում է այնպես, ինչպես Տարոն Մարգարյանն էր որոշել: Փոխվում է միայն մատուցման ձևը՝ ցույց են տալիս՝ իբրև իրենք են աշխատում:

Այսպես, իհարկե, կարելի է ոլորտ առ ոլորտ անցնել և ցույց տալ, թե ինչպես են կայանում քայլածները նախորդների աշխատանքի շնորհիվ և փաստել, որ նրանցից ոչ ոք իր տեղում չէ և չգիտի իր անելիքը:

Ցավալին այստեղ նաև քաղաքապետարանում աշխատող շարքային աշխատակիցների պահվածքն է: Երկերեսանի մարդիկ այսօր շողոքորթում են նորերին, որպեսզի պահեն իրենց աշխատանքը, չկա գոնե մեկը, որ կասի իրականությունը և կբացահայտի մարությանավիրաբյանական կեղծիքը:

Կյանքը բումերանգ է, մի օր բումերանգը կարող է ճշգրտությամբ վերադառնալ և բացահայտել մարդկանց իրական դեմքը: Այդ ժամանակ ով և ինչպես կարձագանքի՝ զավեշտը դա կլինի: Ամեն դեպքում, մարդը պետք ՄԱՐԴ մնա, ոչ թե տմարդի, ով ծառայում է ցանկացած տիրոջ:

NEWSPRESS.am