Մեկնարկը տրված է

Այսօր Սերժ Սարգսյանը ՀՀԿ գրասենյակում ընդունել է Հանրապետական կուսակցությանն անդամակցելու ցանկություն ունեցող երիտասարդներին, ողջունել նրանց ու ցանկացել ակտիվ քաղաքական կյանք:

Դիմելով երիտասարդներին՝ ՀՀ երրորդ նախագահն ասել է, որ ասելիք շատ ունի, սակայն հիմա միայն շնորհավորանքի ժամն է։

«Յուրաքանչյուր ոք, ով անդամագրվում է որևէ կուսակցության, նշանակում է՝ պատրաստ է ակտիվ մասնակցելու քաղաքական գործընթացներին։ Ձեզ հաջողություն եմ մաղթում և ցանկանում եմ, որ այս շենքը, որտեղ տեղակայված է ՀՀԿ ղեկավար մարմինը, ձեզ համար մշտապես լինի ցանկալի վայր։ Ես կցանկանայի, որ դուք ունենայիք հստակ քաղաքացիական կեցվածք»,- ասել է Սարգսյանը։

Հատկանշական է Սերժ Սարգսյանի և ՀՀԿ-ի շարքերը համալրողների հանդիպման համար ընտրված օրը՝ ապրիլի 22. նշենք, որ վաղը լրանում է Սերժ Սրագսյանի հրաժարականի մեկ տարին և վաղը եթեր կհեռարձակվի հեղափոխությունից հետո նրա տված առաջին հարցազրույցը:

Թե ինչ է տվել հեղափոխությունը Սերժ Սարգսյանին և ինչ վերցրել նրանից՝ կիմանանք վաղը, սակայն մինչ այդ Սարգսյանի՝ «ժամանակը կգա և այն ժամանակ կարող է հարցերի քչություն լինի, պատասխանների քչություն չի լինի»-ն, տալիս է ենթադրելու առիթ, որ Սարգսյանը քաղաքական էջը փակել էր առժամանակ: Որպես փորձառու շախմատիստ նա կարող է սպասել հարմար պահին, և օգտագործելով Փաշինյանի իշխանության վայրըթացը՝ մատ հայտարարել նրան:

Գուցե Սերժ Սարգսյանն այդ մատին հասնի քաղաքական նոր ֆիգուրի շնորհիվ. մերժված լինելու բեռը ծանր է 3-րդ նախագահի համար. Գուցե նաև այլևս չստանձնի պետության ղեկավարումը, ինչպես խոստացել ու հետո էլ խոստումը դրժել էր հեղափոխությունից առաջ: Բայց այն, որ ՀՀԿ-ն սկսել է հակագրոհն ու այն գնալով ավելի ուժգին է դառնում, ակնհայտ է:

Հանրապետական հնաբնակներն այս օրերին ակտիվ քննարկումների և հանդիպումների մեջ են՝ ամեն վայրկյան կազմ պատրաստ՝ հասցնելու թիրախային հարվածներ օրվա իշխանությանը, իսկ հաշվի առնելով այն հանգամանքը, որ օրվա իշխանության միայն ղեկավարն է աշխատում՝ մյուսները թախտին նստած վայելում են պաշտոնյա լինելու բերկրանքը, ակնհայտ է դառնում, որ ևս մի քանի թիրախային հարված՝ ու թավշյա իշխանափոխության հաջորդ շրջափուլին կարող ենք ականատես լինել:

Այնպես որ, գուցե Սերժ Սարգսյանը մոդայից մի քիչ ետ է ընկել, բայց իշխանությունը ստանձնած և 11 ամիս երկրի կառավարումից գլուխ այդպես էլ չհանող թավշյա հեղափոխականները կարող են ևս մեկ անգամ փաստել. լավագույն նորը ռեմբրենդինգի ենթարկված հինն է:

Չի բացառվում, որ շուտով Սերժ Սարգսյանի հետ սելֆի անողների թիվն ավելանա՝ փաստելով մերժված հնի մոդայիկ և ակտուալ լինելը:

NEWSPRESS.am