Եթե Ռուսաստանն ապաստան տա Պողոսյանին, կնշանակի, որ նա առոք-փառոք կապրի Ռուբլյովկայում, ընդեղից էլ ձեր վրա կծիծաղի. Էդմոն Մարուքյան (տեսանյութ)
Ես արդեն երևի լրագրող դառնամ-պրծնեմ: Այդ մասին ԱԺ ճեպազրույցների ժամանակ ասաց «Լուսավոր Հայաստան» կուսակցության և խորհրդարանական համանուն խմբակցության ղեկավար Էդմոն Մարուքյանը՝ պատասխանելով հարցին, թե արդյոք Մարուքյանին չի՞ զարմացրել Միհրան Պողոսյանի կողմից Ռուսաստանին քաղաքական ապաստան հայցելու հարցը:
«Ասեմ, թե ինչի վրա է պետք կենտրոնանալ: Մեդիան կենտրոնացել է այն բանի վրա, որ Միհրան Պողոսյանը Կարելիայում բռնվել է ու հիմա էլ դիմել է, որ իրեն քաղաքական ապաստան տան: Մեկիդ մոտ հարց չառաջացավ՝ Միհրան Պողոսյանն ի՞նչ գործ ունի Ռուսաստանում: Մի տարի է՝ գիտենք, որ Միհրան Պողոսյանը պետք է քրեական հետապնդման ենթարկվի: Էդ մեր նախաքննության մարմիններն էնքան սպասեցին՝ էդ մարդուն տարան-առոք-փառոք ճանապարհեցին, որ հետո չկարողանա՞ն բռնեն: Մեկդ էդ հարցը չե՞ք բարձրացնում: Բա ի՞նչ բանի էիք, որ էդ մարդը գնաց, ի՞նչ բանի էիք, որ Բուլկի Արամը գնաց: Հը՞ն: Էդ հարցը չի՞ հետաքրքրում, ինձ էդ հարցն ա հետաքրքրում: Իսկ որ մարդն արդեն գնացել ա, կարա դիմի: Գոնսալեսը Պրահայում ա դիմել, որ ինքը քաղաքական հետապնդվող ա, Ռոդրիգոսը Մոսկվայում ա դիմում, Խոսե Իգնասիոն էլ կարող ա, ասենք, Մեքսիկային դիմի: Ե՞վ»,- լրագրողներին հարցրեց Մարուքյանը:
Նա ասաց նաև, որ հույս ունի, որ ռուսական իշխանությունները նրան քաղաքական ապաստան չեն տա:
Լրագրողների հարցին, թե ինչ կնշանակի, եթե Պողոսյանին ապաստան տան, Մարուքյանը նշեց.
«Ո՞նց ինչ կնշանակի: Կնշանակի, որ քրեական հետապնդում չենք կարող իրականացնել էդ մարդու նկատմամբ, առոք-փառոք կապրի, Ռուբլյովկայում մի հատ տուն կառնի իրա համար, ընդեղից էլ ձեր վրա կծիծաղի»,- ասաց Մարուքյանը:
Մանրամասները՝ տեսանյութում
