Խնդրում եմ չշահարկել Սանասարյանի գործը, ես պարտավոր եմ կատարել օրենքով վերապահված իմ բոլոր լիազորությունները․ Վանեցյան

Հայաստանի Հնարապետւթյունում 2018 թվականի ապրիլ ամսին տեղի ունեցած հայտնի իրադարձություններից հետո, որևէ գործ կարելու, գործ սարքելու  դեպքեր չեն եղել, մենք բոլորս կառուցում ենք իրավական պետություն, և Ազգային անվտանգության ծառայությունը այդ գործում ունի իր առանցքային դերակատարությունը։Այդ մասին այսօր լրագրողների հետ զրույցում ասաց ԱԱԾ տնօրեն Արթուր Վանեցյանը՝ անդրադառնալով Դավիթ Սանասարյանի պաշտպանների հայտարարությանը։ 

«Այն մեղադրանքը, որն առաջադրվել է Դավիթ Սանասարյանին, այս պահին ամբողջությամբ հիմնավորված է տարբեր մարդկանց ցուցմունքներով, կատարված առերեսումներով, բայց չխախտելով պարոն Սանսարյանի անմեղության կանխավարկածը՝ հորդորում եմ բոլորին՝ մի քիչ համբերել, երբ գործը կուղարկվի դատարան և արդեն դատարանում դուք բոլորդ և, առհասարակ, հանրությունը հնարավորություն կունենա ծանոթանալու բոլոր այն ապացույցների հետ, որոնք ձեռք են բերվել քրեական գործի նախաքնության ընթացքում, և բոլորը կգնահատեն այդ ապացույցների իսկությունը»,- նշեց Վանեցյանը։ 

Լրագրողների հարցին, թե տպավորություն է, որ գործով մյուս կալանավորվածները ցուցմունք են տվել և ազատ են արձակվել, ԱԱԾ տնօրենը պատասխանեց․

«Ես գիտեի, որ նման շահարկումներ լինելու են, դրա համար խնդրեցի, որպեսզի մեր մամուի ծառայությունը հանդես գա համապատասխան հայտարարությամբ։ Ազգային անվտանգության ծառայության քննչական դեպարտամենտի քննիչը, ինչպես նաև գործը հսկող դատախազը բողոքարկել են Ադյանին ազատ արձակելու որոշումը, և դատարանը նպատակահարմար է գտել ազատ արձակել պարոն Ադյանին։ Մենք ներկայումս բողոքարկել ենք Վերաքննիչ դատարան և կսպասենք որոշմանը։ Տարոն Ավետիսյանի հետ կապված՝ գնահատվել է նախաքննության ընթացքում կատարված աշխատանքները, ստացված տվյալները։ Անկեղծ ասած՝ շատ մանրամասն չեմ տիրապետում քննչական ապարատի կողմից կատարված քննչական գործողություններին։ Եթե նպատակահարմար են գտել բաց թողելու, ուրեմն արել են։ Կա դատախազություն, որը վերահսկում է նախաքննության ընթացքը, և եթե մենք թույլ տանք որևէ խախտում, ապա դատախազությունը կարձագանքի համապատասխան կերպ»,- նկատեց նա։

Արթուր Վանեցյանը նաև խնդրեց չշահարկել Սանասարյանի գործը։

«Մեծ աղմուկ է ստացել պարոն Սանասարյանի նկատմամբ հարուցված քրեական գործը և իրեն մեղադրանք առաջադրելը։ Ես ուզում եմ ասել մի բան՝ որպես ԱԱԾ տնօրեն, պարտավոր եմ իրականացնել օրենքով վերապահված իմ բոլոր լիազորությունները՝ անկախ նրանից՝ մեղադրվող անձը կլինի իմ ազգականը, բարեկամը, ընկերը, հարազատը, զինակիցը, եթե խախտել է օրենքը, ուրեմն պետք է  կանգնի օրենքի առջև և պատասախան տա։ Եթե նախաքննության ընթացքում և առհասարակ ԱԱԾ աշխատակիցները թույլ կտան անօրինականությունն, նրանք ևս պետք է պատժվեն և նրանց պատիժը պետք է լինի առավել քան խիստ»։