ՊՎԾ- երիտասարդ պաշտոնյայի և բարձրաստիճան կղերականի ազգակցական կապի մասին

Հասարակական քննարկումների թիրախում ՊՎԾ պետի տեղակալ Արգիշտի Էլբեկի Քյարամյանն է։ Երեկ մամուլը նախ բավական մեծ ակտիվությամբ խոսեց երիտասարդ միլիոնատիրոջ մասին, ով չնայած դեռ 30 տարեկանը չի բոլորել, սակայն արդեն միլիոնների կարողություն էր կուտակել, աշխատել ոստիկանությունում, Քննչական կոմիտեում ու այլ ուժային կառույցներում, ապա արդեն պայթեց գլխավոր սենսացիան։

Սկսվեցին քննարկումներ այն մասին, որ իրականում երիտասարդ Արգիշտի Էլբեկովիչը Հայ Առաքելական եկեղեցու Կոտայքի թեմի առաջնորդ Առաքել արքեպիսկոպոս Քյարամյանի որդին է։ Առաջին հայացքից նորմալ է, որ մարդը կարող է ունենալ կրոնավոր հայր, բայց ծառայել նոր իշխանություններին, որքան էլ եկեղեցին ընկալվի որպես հին իշխանությունների պատվար։

Սակայն տարօրինակն այստեղ այն է, որ Առաքելական եկեղեցում բարձրաստիճան եկեղեցականները պարտադիր պետք է լինեն չամուսնացած, ընտանիք չունեցող։ Իհարկե, կան բացառություններ, օրինակ, երբ մարդը ամուսնանում է, այրիանում, ու չի ուզում երկրորդ անգամ ամուսնանալ, քաշվում է վանք ու ապա բարձրանում կրոնական հիերարխիկ սանդուղքով։ Այս դեպքում, արդեն, եթե ամուսնությունից երեխա կա ծնված, լիովին օրինական է համարվում ու չկա որևէ խնդիր երեխայի՝ կրոնական մտածողությամբ օրինական-անօրինական լինելու հետ։

Այն, որ Արգիշտի Էլբեկի Քյարամյանը հնարավոր է՝ Առաքել արքեպիսկոպոսի որդին լինի, երեկ ողջ օրվա ընթացքում անխոնջ կերպով հերքեցին ենթադրյալ հայր ու որդի Քյարամյանները, թեև հրապարակվեցին նաև անուղղակի ապացույցներ։

Եթե ընդունենք մի պահ, որ իրոք Առաքել արքեպիսկոպոսը, մինչև վանք մտնելը այրիացած է եղել կամ նույնիսկ ապահարզանված, ու մտել է վանք դարձել եկեղեցական, ապա այդ մասին հիմա միլիոն անգամ լսած կլինեինք, գոնե հաշվի առնելով, թե մոտ 60 տարեկան բարձրաստիճան կղերականն ինչպիսի ջանասիրությամբ է երեկ ողջ օրվա ընթացքում հայտարարել, որ Արգիշտին իր հորեղբոր թոռն է։

Ուստի, այս վարկածը քիչ հավանական է։ Մյուս վարկածի համաձայն, գյուղերում երբեմն երկու զարմիկներ, հատկապես հայրական գծով զարմիկներ, ունենում են նույն անունը։ Այս վարկածն էլ, եթե տարածվեր կոնկրետ դեպքի վրա, հիմա ենթադրյալ երկրորդ Էլբեկ Քյարամյանին կամ վաղուց հանած-ցուցադրած կլինեին հասարակությանը, կամ եթե մահացած է արդեն, լուսանկար հրապարակած կլինեին Քյարամյան ընտանիքի անունից։

Ուստի, ասպարեզում մնում են մամուլի պնդումները և Առաքել արքեպիսկոպոսի թույլ հերքումները։ Կա նաև վերջին վարկածը, որի համաձայն՝ և՛ եկեղեցականը, և՛ Արգիշտին հանձնում են ԴՆԹ թեստ ու պարզվում է՝ նրանք հայր ու որդի են, թե՝ ոչ։ Սա քիչ հավանական է։ Ոչ ոք անձին չի կարող ստիպել իր կամքին հակառակ նման քայլի գնալ։

Դա պաշտպանված է օրենքով։ Հետաքրքրական է, որ պաշտոնական Մայր Աթոռը քար լռություն պահպանեց և որոշեց չթաթախվել այս պատմության մեջ։

NEWSPRESS.am