Նախկինում մի քանի անգամ դատապարտված դսեղեցի «Տիզը» նորից հայտնվեց բանտում. shamshyan.com

SHAMSHYAN.com-ի տեղեկություններով՝ Հայաստանի քննչական կոմիտեի Լոռու մարզային քննչական վարչության Թումանյանի քննչական բաժնի պետի տեղակալ Արարատ Ուլուխանյանը միջնորդություն է ներկայացրել Լոռու մարզի ընդհանուր իրավասության դատարան, որպեսզի դատարանը, որպես խափանման միջոց, երկամսյա կալանքի որոշում կայացնի Լոռու մարզի Դսեղ գյուղի բնակիչ Շահեն Քոչարյանի նկատմամբ։

Վերջինս մեղադրվում է ՀՀ քր. օր-ի 112 հոդվածի 2-րդ մասի 9-րդ կետի հատկանիշներով, ով այս տարվա մարտի 12-ին, գիշերը ժամը 23։00-ի սահմաններում Դսեղ գյուղի հրապարակում անհիմն դանակահարել էր համագյուղացի՝ 34-ամյա Պետրոս Քոչարյանինն, ում թողնելով անօգնական՝ դիմել էր փախուստի։

Պ. Քոչարյանը գյուղացիների օգնությամբ տեղափոխվել էր նախ Դսեղի բժշկական ամբուլատորիա, որտեղ արձանագրվել էր «կրծքավանդակի ձախ կեսի ծակած վերք» ախտորոշում, տեղում առաջին բուժնություն էր ստացել, որից հետո նրան տեղափոխել էին Վանաձորի բժշկական կենտրոն։

Մինչ Վանաձորի բժիշկները պայքարում էին նրա կյանքի համար, Լոռու մարզի ոստիկանները հայտնաբերում են Շ. Քոչարյանին, ով բերման է ենթարկվում ոստիկանության Թումանյանի բաժին։

Դատարանը դռնփակ դատական նիստն անցկացնելուց և խորհրդակցական սենյակից վերադառնալով՝ բավարարել է քննչական բաժնի պետի տեղակալի միջնորդությունը և Շ. Քոչարյանը, ով նախկինում մի քանի անգամ եղել է դատապարտված և գյուղում հայտնի է «Տիզ» մականվամբ, կալանավորվել է և տեղափոխվել «Վանաձոր» քրեակատարողական հիմնարկ։

Փաստի առթիվ հարուցված քրեական գործի նախաքննությունը շարունակվում է։ 

Նյութն ամբողջությամբ՝ սկզբնաղբյուր կայքում: