Եթե ուզում եք դո՛ւք անեք, որ շները և կատուներն իրենց շնորհակալությունը ձեզ հայտնեն, դո՛ւք արեք․ Զոհրաբյանը՝ «Իմ քայլին» (տեսանյութ)

Կառավարությունն ինձ անընդհատ զարմացնում է: ԱԺ այսօրվա նիստում հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը: Նա նշեց, որ կառավարությունը քննարկել է նախագիծը, դրական եզրակացություն տվել, իսկ այժմ ԱԺ-ն առաջարկում է չընդունել այն։

«Կառավարության նիստին որոշ անդամներ քննարկման ժամանակ չգիտեմ ինչի ուրախանում են՝ դե դա իրենց էմոցիաների հարցն է, դրական մեսիջներով անում են առաջարկներ, որն ավելի է ոգևորում ինձ, ասում են՝ չէ, դուք քիչ պատիժ եք նախատեսում, մինչև 3 տարի ազատազրկում, ասում ենք՝ բրավո, համաձայն ենք (ծափահարում է-հեղ.), դրական մոտիվացիայով գալիս է ԱԺ, բայց հետո ստանում ենք նույն կառավարությունից կից գրություն՝ երկար-բարակ պատմում են, որ «ընդհանուր մոտեցումները լավ են, բայց քանի որ ԱԺ-ում մենք ստեղծել ենք, մենք քննարկում ենք, մենք անում ենք, առաջակում ենք ձեռնպահ մնալ օրենքի նախագծի ընդունումից»,-ասաց Զոհրաբյանը և հավելեց, որ իշխող մեծամասնությունը ցանկանում է ինքը ներկայացնել այդ նախագիծը, քանի որ այն իրականում լավ առաջարկ է:

«Հիմա եթե շունն ու կատուն էլ եք քաղաքականացնում և ուզում եք անպայման դա ներկայացված լինի «Իմ քայլի» կողմից, քա՛վ լիցի, խնդիր չկա, արե՛ք դուք. Եթե գտնում եք, սա այն հարցն է, որ անպայման դուք պետք է անեք, որ շները և կատուները իրենց խորին շնորհակալությունը հայտնեն ձեզ, արեք դուք, բայց արեք հնարավորինս արագ, որովհետև վիճակագրությունն իսկապես բավական ծանր է, կենդանիների խեղում, սպանություն»,- ասաց նա և հավելեց, որ ինքը նախագիծը չի հանի շրջանառությունից. «Դուք եք ուզում անել էդ լավ բանը, արեք այդ լավ բանը դո՛ւք, ես իմ նախագիծը շրջանառությունից չեմ հանելու. դրեք, մերժեք»։

Հիշեցնենք, որ ԲՀԿ-ն առաջարկում է կենդանիների հանդեպ դաժան վերաբերմունքը, որը հանգեցրել է կենդանու ոչնչացմանը կամ խեղմանը, քրեականացնել։ Նախագծով առաջարկվում է որպես պատիժ սահմանել նվազագույն աշխատավարձի մինչև երեք հարյուրապատիկի չափով տուգանք, կալանք` մեկից երեք ամիս ժամկետով կամ ազատազրկում` մինչև մեկ տարի ժամկետով:

Մանրամասները՝ տեսանյութում