Փողերն ու ներդրողները գնում են երկրից, իսկ Փաշինյանը գնում է Հանրային ռադիո՝ դուռ սարքելու

Ներդրողները չեն ցանկանում Հայաստանում ներդրում անել․ մարդկանց մոտ մտավախություն կա, մտածում են՝ անե՞լ Հայաստանում ներդրում, թե՞ ոչ, որովհետև կա վտանգ, որ մարդը կարող է քնել, հելնել ու այլ բան որոշել, օրինակ՝ ընկերս՝ թագաժառանգը, ցանկանում էր հյուրանոց կառուցել Հայաստանում, հիմա ասում է, որ հրաժարվում է, չի կառուցի․․․

Սա «Բարգավաճ Հայաստան» խմբակցության ղեկավար Գագիկ Ծառուկյանի գնահատականն է հայաստանյան ներդրումային միջավայրի վերաբերյալ։

Այն, որ ներդրողները Հայաստանից հեռանում են, փաստում է ոչ միայն Գագիկ Ծառուկյանը, այլ նաև տնտեսության համար թիվ 1 պատասխանատուն։

Տնտեսական զարգացման և ներդրումների նախարար Տիգրան Խաչատրյանն օրերս ևս հայտարարեց, որ ներդրումներն այն մակարդակի վրա չեն, որն իրենք՝ նոր կառավարությունն ակնկալում էր։

Փաստորեն, ներդրողները Հայաստանից հեռանում են տնտեսական հեղափոխության ֆոնին, և ստացվում է՝ մի կողմից ունենք տնտեսության առաջընթացի մասին միայն խոստումներ, մյուս կողմում՝ Հայաստանից հեռացող փողեր։

Տնտեսության իրական պատկերն այսպիսին է, որը վարչապետ Փաշինյանը կա՛մ չի նկատում, կա՛մ նկատում է, բայց բոլորովին այլ բան է ներկայացնում։

Անշուշտ, վաղն էլ Փաշինյանը, ինչպես արդեն ֆեյսբուքյան իր էջով տեղեկացրել է, կհայտարարարի 100 բան, որն ինքը կատարել է։

Ավելի ճիշտ՝ կփորձի հիշել իր տված 100 խոստումն ու հեռախոսի մեջ պահվող ֆայլից հատ առ հատ կարդալ ու ինքն իրեն հարց ուղղել՝ սա տնտեսական հեղափոխությո՞ւն է, այո՛, տնտեսական հեղափոխություն է։

Սա փաշինյանական թխած ոճով հասարակական կարծիքը մանիպուլացնելու արդեն փորձված տարբերակ է․ հիշեցնենք, որ Փաշինյանն այն թխել է նախկին վարչապետերից մեկից․ կարենկարապետյանական ոճով ինքն իրեն հարց տալու և դրանց պատասխանելու միջոցով Փաշինյանն իրեն զրկում երկրում կատարվողի վերաբերյալ իրական ադեկվատ գնահատականներից։

Նա գերադասում է լինել կա՛մ խաբված, կա՛մ խաբել ժողովրդին, որն այսուհետ օր առ օր զգում է տնտեսական ոչ թե հեղափոխություն, այլ գահավիճում, իսկ երկրում սկիզբ առած թանկացումների ալիքը հիմք է դնում լայնածավալ բողոքի ալիքի։

Հիշենք, որ Փաշինյանն այնքան է խոստումներ տվել ու մոռացել, որ արդեն հասցրել է հայտնվել դատարանում․ քաղաքացին նրան դատի է տվել խաբելու համար, տված խոստումների մասին վարչապետին անընդհատ հիշեցնում է նաև «Սուտ Նիկոլ» շարժումը։ Այնպես որ, Փաշինյան Նիկոլից հասարակությունը պահանջում է կա՛մ գործ անել, կա՛մ հեռանալ այնպես, ինչպես որ խոստացել է։

Հիշեցնենք, որ այսօր էլ կառավարության ղեկավարն աշխատելու փոխարեն նախընտրեց մի քանի ժամ անցկացնել Հանրային ռադիոյում, գնացել էր ուղիղ եթերում վերանորոգելու անցյալ տարի կոտրած դուռը․ կրկին էժանագին PR` գործի փոխարեն։

NEWSPRESS.am