Քոչարյանը մարտահրավեր կնետի, իսկ Փաշինյանը թևեր կկտրի

Հայաստանի կալանավորված 2-րդ նախագահ Ռոբերտ Քոչարյանը հարցազրույց է տվել Reuters գործակալությանը և խոսել առաջիկայում իր քաղաքական նպատակադրումների մասին։ 

Քոչարյանը հայտնել է, որ Հայաստանում հզոր ընդդիմադիր ուժեր են համախմբվում, որոնք մոտ ապագայում մարտահրավեր են նետելու նոր իշխանությանը։

2-րդ նախագահը նաև բացել է փակագծերն ու տեղեկացրել, որ ինքն անձամբ կներգրավվի այդ ընդդիմության շարքերում։

Այն, որ Քոչարյանն ունի քաղաքական շատ լուրջ նպատակներ, ակնհայտ էր նաև նրա կալանավորումից առաջ․ նրա նկատմամբ դեռ նախորդ տարի քրեական գործ հարուցելուց հետո, արդեն ակնհայտ էր՝ Քոչարյանը կիկին մեծ քաղաքականության մեջ է, որից առժամանակ հեռացել էր։ Հիմա, երբ Սահմանադրական դատարանը որոշում է կայացրել, ըստ որի՝ կա՛մ Քոչարյանի գործը քննող դատավորը վերջնական վճիռ է կայացնում, կա՛մ Քոչարյանին ազատ արձակում կալանքից, իսկ այս որոշումը Քոչարյանի համար կանաչ լույս է վառել ու նոր իշխանությանը մարտահրավեր նետելու հեռանկարն ավելի մոտեցրել։

Սրան զուգահեռ, սակայն, վարչապետ Փաշինյանն է՛լ ավելի է սեղմում ամրագոտիները․ եթե նախկինում՝ դարձյալ իր կողմից այդքան քննադատած սուպերվարչապետության հաշվին սպառնում էր ԱԱԾ-ով և ոստիկանությունով մարդկանց գետնին պառկեցնել, պատերին ծեփել, իսկ որոշների ծնոտներն էլ ջարդել, այսօր՝ իր վարչապետության մեկ տարվան նվիրված ամփոփիչ ասուլիսի ժամանակ, սպառնաց՝ այս անգամ այլ բան անել։ Փաշինյանն ասաց, որ այս անգամ թևեր են կտրվելու։

«Ես նմա՞ն եմ մի մարդու, որ կարող եմ լինել ՀՀ վարչապետ, և այդ իշխանության ներսում կարող են լինել թևեր: ՀՀ իշխանության մեջ, մասնավորապես՝ գործադիր իշխանության մեջ չեն կարող լինել թևեր: ՀՀ կառավարությունը և գործադիր իշխանությունը միասնական մարմին է, և այն ղեկավարվում է վարչապետի կողմից: Եթե թևեր ի հայտ գան, ես այդ թևերը կկտրեմ»,-ասաց Փաշինյանը։

Փաստորեն, նա չի նկատում, որ այդ թևերն արդեն կան, ներիշխանական գզվռտոցն արդեն վաղուց է իր խոր արմատները գցել, արդեն իսկ ակնհայտ է, որ «Իմ քայլը» դաշինքի ներսում հստակ ուրվագծվում են իշխանականներն ու ընդդիմադիրները։

Այնպես որ, եթե Փաշինյանը խոստանում է թևեր կտրել, ապա դա պետք սկսի իր ղեկավարած քաղաքական թիմից։

Փաստորեն, երկրում ուշագրավ զարգացումներ են սպասվում․ Փաշինյանը թևեր կկտրի, որոնք Քոչարյանի գլխավորած երկրորդ հեղափոխական ալիքը կքշի ու կտանի:

NEWSPRESS.am