Շոումենը հիմա էլ նիհարել է ուզում

Այսօր վաղ առավոտից մեդիադաշտը սևեռվեց Նիկոլ Փաշինյանի վրա. Արցախից վերադարձած վարչապետը որոշել էր ուրբաթ օրն աշխատանքի գնալ հեծանիվով:
Բայց ինչպես ամեն բան Փաշինյանի կյանքում, հեծանիվով աշխատանքի գնալը ևս, դարձյալ կայացել էր ֆեյսբուքյան ուղիղ եթերում:

Նա որոշել էր նմանվել այդպես երևանյան փողոցներում շրջող ՀՀ քաղաքացիներին, սակայն մի տարբերությամբ՝ նրանք հեծանիվով աշխատանքի են գնում կամ զբոսնում իրենք իրենց համար, որևէ մեկին որևէ բան ցույց տալու կարիք չունեն, իսկ Փաշինյանը հեծանիվով աշխատանքի է գնում ֆեյսբուքի և էժանագին PR-ի համար:

Այն, որ PR-ն էժանագին էր, փաստում էին Փաշինյանի ձեռքը կրակն ընկած թիկնապահները, ու նրա հետևից սլացող ավտոշարասյունը:

Փաշինյանն արդեն շոուների և բեմականացման մասնագետ է դառնում, իսկ կարմիր լույսի տակ կանգնող վարչապետի անվտանգության աշխատակիցների մեքենան՝ դառնում այս թեման զարգացնելու և հաջորդ սերիան թողարկելու առիթ:

Իսկ շոուի հաջորդ սերիան իրեն սպասեցնել չտվեց. Փաշինյանը ֆեյսբուքի ուղիղ եթեր մտավ նաև երեկոյան, ասաց, որ հեծանիվով երթևեկելու կանոններին դեռ չի տիրապետում ու անկեղծացավ՝ նաև ունի նիհարելու խնդիր:

Տարվա մեջ մեկ-երկու անգամ իրեն որպես հեծանվորդ փորձարկող Փաշինյանին թվում է, որ սա է 21-րդ դարի երկրի ղեկավարի իդեալական կերպարն է:

Նրան համոզել են, որ այսպես կթվա ժողովրդի ծոցից դուրս եկող և նրանից երբեք չհեռացող ղեկավար ու կերկարաձգի իր պաշտոնավարման ժամկետը, որն օր օրի մոտենում է իր վերջնագծին:

Հասարակությունն այլևս դուրս է եկել էյֆորիկ տրամադրություններից, իր կաշվի վրա փոփոխություն չի զգում, կամ զգում է դեպի վատը, ուստի գնալով՝ իրականությունն ավելի անգույն է դառնում նրա համար՝ հեռու տնտեսապես զարգացող երկիր ունենալու իրականությունից: Այո՛, Փաշինյանը հեծանիվով է գնում աշխատանքի, իսկ ներդրողներն ուղղաթիռներով հեռանում են մեր երկրից՝ իրենց հետ տանելով նաև այստեղ ունեցած կապիտալը: Հայաստանն այլևս անհետաքրքիր ու անվստահելի գործընկեր է փող ունեցող գործարարի համար, իսկ այդ վստահությունը վերականգնել չի ստացվում ո՛չ ֆեյսբուքյան լայվերով, ո՛չ մարդկանց բռնելով, ոչ էլ ժողովրդավարության անվան տակ սեփական անբցիաներն ու վրեժխնդրությունն առաջ տանելով: Երկիրն առաջ տանելու համար գործ անող է պետք, որը չկա:

NEWSPRESS.am