«Մաքրելու ենք». խոստո՞ւմ, թե՞ սիթքոմ. դերասանի կերպարը չի լքում Մարությանին (տեսանյութեր)

Վարչապետ Նիկոլ Փաշինյանն իր ասուլիսի ժամանակ բողոքեց, թե այնպիսի տպավորություն է, որ Հայկ Մարությանը 10 տարվա քաղաքապետ է.

«Մարությանը ընդամենը 6 ամիս է, ինչ քաղաքապետ է, ի՞նչ եք ուզում Մարությանից»:

Այ, այստեղ՝ «մի փոքր սպառովչկա». նախ՝ Երևանի ավագանու ընտրությունները եղել են 2018 սեպտեմբերի 23-ին, որից անցել է 8 ամիս, իսկ հետո՝ եթե Մարությանը չէր կարող դրական փոփոխություններ անել, կամ գոնե իրականացնել իր տված խոստումներից գոնե մեկը, ապա կարող էր պարզապես հանգիստ նստել իր տեղը՝ մնալ որպես դերասան ու իր դերը խաղալ բեմում և էկրանից:

Հիշեցման կարգով էլ ներկայացնենք նախընտրական շրջանում Մարությանի տված խոստումներից «քայլ 2-րդը»: Տեսանյութը նրանց համար է, ովքեր չեն հիշում.

Այս տեսահոլովակից հետո աղբակույտը, որի ֆոնին կանգնել էր Մարությանը, ավելի է մեծացել: Եվ ոչ միայն այդ աղբակույը: Չնայած խոստումներին՝ քաղաքն աղբից չի մաքրվում:

NEWSPRESS.am-ը բազմիցս անդրադարձել է Ծարավ աղբյուր փողոցի աղբակույտին, որը սարի էր վերածվում՝ այն ժամանակին չհեռացնելու պատճառով: Այստեղ տևական ժամանակ տեղադրված էր մեկ աղբարկղ: Աղբը հեռացվում էր այն ժամանակ, երբ աղբարկղը ծածկված էր լինում:

Այն բանից հետո, երբ Երևանի քաղաքապետ դարձած կոմիկ դերասան Հայկ Մարությանը, իր դերի մեջ, որոշեց վերցնել հարուստների թաղամասերի աղբամաններն ու տեղադրել «աղքատների» թաղամասում, ասել է թե՝ որոշել էր, որ Ռոբին Հուդ է խաղալու, Ծարավ աղբյուր փողոցի կիսաջարդ աղբամանի մոտ հայտնվեց ևս մեկը: Սակայն դրանից իրավիճակն ավելի վատացավ. եթե նախկինում աղբը հեռացվում էր մեկ աղբաման աղբով լցվելուց և թափվելուց հետո, ապա թերևս այս տրամաբանությամբ, պատկան կառույցները սպասում են, որ աղբը ծածկի այս երկու աղբամանները, որից հետո հնարավոր է հեռացվի այն:

Ու այս աղբի սարի ֆոնին, հարց է առաջանում՝ քանի կոպեկի արժեք ուներ այն ժամանակ դեռ քաղաքապետ չդարձած ու Կարգին Հայկո մականվամբ հայտնի Մարությանի նախընտրական քարոզարշավի ժամանակ արված հայտարարությունը, թե կուտակված աղբ չեք տեսնի:

Մարությանը, իհարկե, կարող է հեռուստաեթերներից հանել տալ իր մասնակցությամբ բոլոր սերիալները, ֆիլմերն ու սիթքոմները, սակայն ազատվել դերասանի կերպարից, նրան հազիվ թե հաջողվի. դերասանի կերպարը չի լքում Մարությանին...

Ու այս ֆոնին, ստացվում է, որ նրա՝ վերը տեղ գտած տեսահոլովակը սիթքոմի ժանրից էր: