Փաշինյանը կհրահանգի՞ բերման ենթարկել Քոչարյանի դեմ «Դըմփ-դըմփ-հու» անողներին, ինչպես դա արեց Էջմիածնում

Ռոբերտ Քոչարյանի դեմ բողոքի ակցիա իրականացնողները, որոնք մշտապես տարբեր մարդկանց հրահանգով ցանկացած տեղում ի վիճակի են մոբիլիզացվել և ակցիա իրականացնել, այսօր Երևանի ընդհանուր իրավասության դատարանի Ավան–Նոր Նորքի նստավայրում բողոքի ակցիաներ էին իրականացնում «Դուխով» պաստառներով և «Դըմփ- դըմփ- հու» գոչյուններուվ ու ծափերով։ 

Հեղափոխության բրենդ համարվող այս դրսևորումների հեղինակային իրավունքը, ինչպես գիտենք, պատկանում է Նիկոլ Փաշինյանին և նրա քաղաքական թիմին, որից օգտվելու կամ որն օգտագործելու որևէ իրավասություն չունի իրենցից բացի ոչ ոք։

Այդպես էր այն ժամանակ, երբ էջմիածին քաղաքում «Դուխով» պաստառներով և «Դըմփ- դըմփ- հու» գոչյուններով ու ծափերով բողոքի ակցիա իրականացրեց Արթուր Ասատրյանը։ Ակցիայից անմիջապես հետո Նիկոլ Փաշինյանը և՛ իր ֆեյսբուքյան էջում, և՛ կառավարության նիստում շատ կտրուկ անդրադարձավ այդ հանրահավաքին։

Փաշինյանն այն ժամանակ հայտարարեց, որ անընդունելի է, որ պղծեն սիրո և համերաշխության հեղափոխության խորհրդանիշները և հեղափոխության անունը օգտագործեն մաֆիոզ պատերազմներում: Փաշինյանը հաթաթա տվեց, թե՝ թույլ չենք տա։
Ինչպես հայտնի է, Փաշինյանի այս հայտարարությանը հաջորդեց Արթուր Ասատրյանի կալանավորումը։

Այսօր այդ սիրո և հեղափոխության սիմվոլները ինչ-ինչ անհայտ ուժեր, տարբեր բողոքի ակցիաների մասնակցության սեփական կեցությունն ապահովող երիտասարդներ օգտագործեցին Երևանի ընդհանուր իրավասության դատարանի Ավան–Նոր Նորքի նստավայրում։

Նրանք այդ հեղափոխական սիմվոլներն օգտագործեցին ընդդեմ Ռոբերտ Քոչարյանի և հիմա հարց է առաջանում՝ եթե վաղը սույն երիտասարդները հեղափոխության բրենդն օգտագործելու և հեղինակային իրավունքը խախտելու համար բերման չենթարկվեն,ինչպես դա եղավ Էջմիածնում կազմակերպված խաղաղ հանրահավաքի ժամանակ, և դրան ֆեյսբուքյան իր էջում և կառավարության նիստում չարձագանքի Նիկոլ Փաշինյանը, նշանակում է, որ նրանց դատարանի շենքի դիմաց էր գործուղել հենց ինքը։

Եթե Փաշինյանը դա չարեց, նշանակում է, որ այս ամենը կատարվում է բացառապես նրա թողտվությամբ և հրահանգով, ինչը գալիս է փաստելու, որ Քոչարյանի գործը զուրկ է իրավական գործ լինելու հեռանկարից․ այն ընդամենը քաղաքական վենդետա է։

NEWSPRESS.am