«Ես իմ ամուսնուն շատ եմ սիրում, ի՞նչ ասեմ»․ Աննա Հակոբյանը շրջագայում է ամուսնու հետ, քանի որ սիրում է (տեսանյութ)

Պարզվում է՝ ՀՀ վարչապետի տիկնոջ՝ Աննա Հակոբյանի, ամուսնու հետ հաճախակի շրջագայությունների պատճառը սերն է։

Համենայնդեպս, լրագրողների հետ հանդիպման ժամանակ, հարցին, թե ինչո՞ւ է տիկինը հաճախ ուղեկցում ամուսնուն արտասահմանյան այցերի ժամանակ, հատկապես որ նախկիններն այդքան հաճախ չեն ուղեկեցել, վերջինս պատասխանեց, որ ինքն իր ամուսնուն շատ է սիրում։

«Երբ ես ուղեկցում եմ իմ ամուսնուն գործուղումների ժամանակ, դա պետբյուջեի հաշվին չի լինում։ Նախորդները չէին անում, չգիտեմ՝ ինչի՞ չէին անում, իրենք էլ կարող էին, իրենք էլ ունեին այդ հնարավորությունը, որ երբ իրենց ամուսինը գնում էր որևէ տեղ, կարող էին նստել ինքնաթիռը, գնալ ու իր կողքը լինել։ Ես ի՞նչ իմանամ՝ ինչու չէին անում: Ես իմ ամուսնուն շատ եմ սիրում, ի՞նչ ասեմ»,- նշեց նա։

Սակայն շատ սիրելուց բացի, հաճախակի շրջագայությունները նաև այլ նպատակ ունեն։ «Իմ քայլը» և «City of smile» («Ժպիտների քաղաք») հիմնադրամների հոգաբարձուների խորհրդի նախագահ Աննա Հակոբյանը նկատեց, որ իր ուղևորությունների համար ծախսված գումարներից ավելի շատ օգուտ է բերում։

«Օրինակ՝ ԱՄՆ այցը, որի համար ծախսվել էր 10 մլն դրամ, մինչդեռ դրա արդյունքում 755 մլն դրամ էր բերվել Հայաստան»,- ասաց նա՝ ընդգծելով, որ եթե օգուտ չլիներ, չէր գնա, հատկապես, որ ընտանիքի տեր է և ժամանակ չունի հենց այնպես շրջագայության գնալու։

«Ես ունեմ մեծ ընտանիք, ունեմ ամուսին, որի կողքը պետք է լինեմ Հայաստանում: Ես ունեմ երեխաներ, փոքրիկ, որին ամեն անգամ թողնել ու ինչ-որ տեղ գնալը մեծ սթրես է և՛ ինձ, և՛ իր համար»,- ասաց Աննա Հակոբյանը։