Փաշինյանը Բաքվին չնեղացնելու համա՞ր է որդուն տեղափոխել Հայաստան

Ինչպես և սպասելի էր՝ Հայաստանում բավական բուռն ընդունվեց, վարչապետ Նիկոլ Փաշինյանի՝ Արցախում պարտադիր զինվորական ծառայություն իրականացնող որդու՝ Աշոտ Փաշինյանի գտնելը Սովետաշենում, այսինքն՝ Արցախից դուրս։

Իհարկե, հայկական իշխանությունները փորձեցին տարատեսակ մեկնաբանություններով լղոզել խնդիրը, սակայն ամեն դեպքում, այդ տեղափոխումը հասարակության մոտ բազմաթիվ հարցականներ առաջացրեց։

Փաստորեն, եթե հավատանք մամուլում տեղ գտած հրապարակումներին, Աշոտ Փաշինյանին Հայաստան տեղափոխել են բավական վաղ, և այն, որ Աննա Հակոբյանը հայտարարում է, թե պատերազմը չի ավարտվել, դրա համար էլ իր որդին Արցախում է ծառայում, մեղմ ասած, ընթացիկ պոպուլիզմի դրսևորումներից կարող է լինել։

Այլ է հարցը, թե ինչու է Աշոտը տեղափոխվել Հայաստան։

Հայկական մեդիայում մի քանի վարկածներ են պտտվում, որոնք բոլորն էլ այս կամ այն կերպ կապված են հնարավոր դավադիր պատերազմի վերսկսման վտանգի հետ։ Որքան էլ կարող է զարմանալի թվալ, սակայն հայկական ղեկավարության որդիների՝ Արցախում զինվորական պարտադիր ծառայություն անցնելը, պարզվում է՝ գրավել է նաև Բաքվի ուշադրությունը։ Ավելի կոնկրետ՝ Ադրբեջանի ԱԳ նախարար Էլմար Մամեդյարովը, ռուսական «Կոմերսանտին» տված հարցազրույցում խոսել է այս մասին։ Մասնավորապես, ի պատասխան լրագրողի այն հարցին, թե Փաշինյանը ցանկանում է, որպեսզի Ստեփանակերտը ներգրավվի բանակցային գործընթացում, քանի որ պնդում է, որ Արցախի ժողովուրդն իրեն չի ընտրել և իրեն չի ենթարկվում, Մամեդյարովն ասել է, թե դա պոպուլիզմ է, քանի որ որևէ մեկը կարող է Փաշինյանին հարցնել, թե ո՞ր երկրի ղեկավարների որդիներն են զինվորական ծառայություն անցնում Բաքվում, և ապա՝ ո՞ր երկրի հարկատուների հաշվին են դոտացիաներ հատկացվում Ստեփանակերտին՝ ակնարկելով Հայաստանին։

Այս երկու հայտարարություններն էլ իրենց զուգահեռներն ունեն հայկական իրականության մեջ։ Մասնավորապես, նախ չգիտես՝ ինչու Աշոտը տեղափոխվեց Հայաստան Արցախից, ու ապա՝ հայկական սոցկայքային տիրույթում հայտնվեցին կոչեր, թե Երևանը պետք է զրկի Ստեփանակերտին դոտացիայից, որ նոր հասկանան, թե ինչ է նշանակում առանձին պետություն ասվածը։ Ակամա այն միտքն է առաջանում, թե Փաշինյանն ամեն ինչ փորձում է անել՝ կիրթ Ալիևին ու նրա վարչակազմին չնեղացնելու համար, այն դեպքում երբ Բաքվում նույն կիրթ Ալիևը հայտարարել է, որ պատերազմը դեռ չի ավարտվել, ու իրենք շարունակելու են աճեցնել իրենց ռազմական հզորությունը։

NEWSPRESS.am