Հայկ Մարության, եթե տղամարդ ես, արի Թումանյան փողոց, արի մենակ, արի առանց Նիկոլի

Այլևս նորություն չեմ կարող ասել Երևանի աղբահանության վերաբերյալ: Բազմիցս ենք ասել՝ Հայկ Մարությանն ինչ քաղաքապետի աթոռին է բազմել, ի հակառակ իր՝ «մաքրելու ենք» խոստմանը, աղբը լցվում է մեր տներ:

Դրսում աղբն արդեն աչքներիս սովորական է դարձել, սակայն դրա հետևանքներն արդեն լցվել են մեր տները: Առնետներն ու մկները վխտում են Երևանի կենտրոնում, իսկ շենքերի մուտքերում խավարասերների խրախճանք է:

Ո՞վ էր Երևանի կենտրոնում այսքան խավարասեր տեսել, դրանք արդեն մեր տներն են լցվում, ապրում ու ընթրում մեզ հետ:

Անցյալ տարի, ոչ մի թունաքիմիկատ չօգտագործվեց Երևանի կենտրոնական հատվածներում ծառերի սրսկման համար՝ պատճառը հեղափոխական խառը շրջանն էր, այս տարի էլ՝ այդ հեղափոխության հետևանքի պատճառով չսրսկվեցին ծառերը, ու ծառի ոջիլները լցվեցին բնակարաններ: Ապացույցներ, եթե քաղաքապետարանից ցանկանան, առանց վարանելու թող դիմեն, կոնկրետ հասցեով կարող եմ ասել, ուր գնան և ինչ տիպի ոջիլների ու բլոճների կարող են հանդիպել:

Իսկ հիմա կարող եմ Հայկ Մարությանին հրավիրել Թումանյան 31 շենք։ Արի՛, տես աղբն ու վերելակի վիճակը, սրանք երկուսն էլ քո քարոզարշավի հիմնական մեխերն են եղել, թե իբրև մաքրելու ես ու մահվան վերելակներին վերջ ես տալու: Ո՞ւր են քո խոստումները, թե՞ կարծում էիր՝ միլիոնանոց քաղաք ղեկավարելը հումորային ֆիլմ նկարելու մակարդակի գործ է:

Հասցեն ասել եմ, նորից կրկնում եմ՝ Հայկո՛, թե տղամարդ ես ու կարող ես բնակիչների հետ առերեսվել, արի այդ շենք, արի՛ առանց Նիկոլի, արի ու ժողովրդին պատասխան տուր քո անգործության համար: Չհամարձակվես, ասել, թե նախագիծ ունես, որ մենք վերելակները պետք է սարքենք։ Այդ դու ու քո բերած ներդրումներով պետք է վերելակները սարքեիր, թե ինչու ընտրեց ժողովուրդը քեզ, քո այդ ճոռոմ խոստումների համար, ոչ թե սիրուն աչքերիդ: Կգա՞ս, դուխո՞վ տղա ես, դուխով քաղաքապե՞տ ես, թե քո դուխը միայն քաղաքապետարանի շենքի ներսում է դրսևորվում ու Նիկոլի կողքին կանգնած ժամանակ:

Եթե խուսափես՝ չգաս, ապա իմացիր՝ ճակատիդ կդաջվի անպատասխանատու, վախկոտ ու թուլամորթ պիտակը։ 

Ինձ այլևս չեն հետաքրքրում «Սանիթեքին» տուգանել կամ չտուգանելը, հրաժարվել կամ չհրաժարվելը՝ ես պահանջում եմ մաքրություն, ես չեմ ուզում այս քաղաքն ու ես՝ որպես մշտական բնակիչ, հետ քայլ ապրեմ, ինչ է թե՝ քաղաքապետի պաշտոնում հեղափոխական մարիոնետ նստի: Փոխեք այս քաղաքապետին, հակառակ դեպքում՝ քաղաքը կփոխի իր պետին:

Արիանա (Արմենուհի) Հովսեփյան
NEWSPRESS.am-ի հիմնադիր-տնօրեն