Պետական ուղղաթիռը վերածում են մետաղի ջարդոնի՞

Վարչապետ Նիկոլ Փաշինյանն ու իր կինը՝ տիկին Աննան, հաճախ են քննադատվում հարկատուներիս հաշվին վոյաժներ կազմակերպելու համար։ Տիկին Աննան քննադատվում է էլ ավելի, որովհետև, եթե Փաշինյանը երկրի կառավարության ղեկավարն է և իրեն սպասարկող ուղղաթիռով և ինքնաթիռով պետք է երկրից երկիր մեկնի ամենատարբեր հարցերով, ապա նրա կողքին տիկին Աննայի նեկայությունը շարունակում է մնալ անհասկանալի։

Ինչևէ, թողնենք քննադատություններն ու արձանագրենք մեկ պարզ ճշմարտություն՝ վարչապետ Փաշինյանն էլ ուղղաթիռով Արցախ չի գնում։

Հավանաբար, շատերդ նկատած կլինեք,իսկ չնկատելն անհնար է, ընդամենը պետք է մի քանի րոպե ՀՀ վարչապետի կամ կառավարության ֆեյսբուքյան էջն ուսումնասիրելու համար, որտեղ վաղուց տեղադրված չեն ուղղաթիռով Արցախի երկնքում գտնվող Փաշինյանի նկարները։

Իսկ թե ինչու վարչապետն այլևս Արցախ չի գնում հարցի պատասխանը շատ պարզ է․ որդին՝ Աշոտն, այլևս Արցախում չի ծառայում․ նա վաղուց տեղափոխվել է Հայաստան` չնայած մոր պնդումներին, թե վերադառնալու է։ 

Այս համատեքստում ստացվում է՝ Փաշինյանը մտքով անցած ժամին ուղղաթիռով շտապում էր ընտանիքի հետ Արցախ՝ ծառայող որդուն տեսակցության, իսկ որպեսզի նաև իրեն այնտեղ դիմավորող ու ճանապարհող լինի՝ հրահանգվում էր նաև ձեռքի հետ հանդիպում կազմակերպել Արցախի ղեկավարության հետ, որպեսզի ստացվի գործի բերումով է հասել այնտեղ։

Հիմա վարչապետը կա՛մ պետք է ընդունի, որ այլևս գործի բերումով Արցախ հասնելու անհրաժեշտություն չկա, կա՛մ փաստի՝ Արցախում այդ գործերը կային, քանի դեռ այնտեղ էր որդին։

Հիշեցնենք, որ Փաշինյանը պնդում էր, որ վարչապետի ծառայողական ուղղաթիռն ունի պարտադիր թռիչքային ժամեր և ջարդոնի չվերածվելու համար այդ ուղղաթիռը պարտավոր է դատարկ էլ օդ բարձրանալ, գնալ Ստեփանակերտով, Վարդենիսով պտտվել, հետ գալ։

Փաստորեն, հիմա այդ ուղղաթիռը վերածվում է մետաղի ջարդոնի՞, օդ չի՞ բարձրանում, փչացվու՞մ է պետական գույքը։

NEWSPRESS.am