«Ախպոր պես, հրաժարվի պրծնենք». «Գո՞հ եք Նիկոլ Փաշինյանի ղեկավարումից» հարցման արդյունքները (ֆոտո)

«Իմ քայլը» ֆեյսբուքյան էջում հարցում է արվել, թե արդյոք քաղաքացիները գո՞հ են Նիկոլ Փաշինյանի՝ որպես վարչապետի, ղեկավարումից: Հարցման արդյունքները ցույց են տվել, որ քաղաքացիների գերակշռող մասը գոհ չէ նրա պաշտոնավարումից:

Իհարկե, այս հարցումն ինքնանպատակ չէ... չի բացառվում, որ այն հարկավոր է հենց Փաշինյանին... չի բացառվում նաև, որ Փաշինյանի հրաժարականը մոտ է:

Հարկ է հիշել Նիկոլ Փաշինյանի հայտարարություններն այն մասին, թե ինքը հրաժարական չի տա այնքան ժամանակ, քանի դեռ ժողովուրդը դա չի պահանջել:

Ըստ էության, որքան Փաշինյանն իր ասուլիսների ժամանակ ու տարբեր առիթներով հայտարարի, թե դժգոհության ալիք չկա, այնուամենայնիվ, նա այնքան փորձառու քաղաքական գործիչ է, որպեսզի կարողանա հասկանալ, թե ինչ խնդրի առաջ է կանգնած:

Նա գոնե ինքն իրեն խոստովանում է, որ նախկին հավատն իր նկատմամբ ժողովուրդն այլևս չունի: Թեկուզ հենց այն բանի համար, որ ինքը չի կատարել իր տված խոստումներից և ոչ մեկը:

Ավելին՝ Արցախի խնդրի կարգավորման շուրջ տեղաշարժ չկա, իսկ եղած մոտեցումները խոստումնալից չեն: Փաշինյանը կա՛մ չի տիրապետում խնդրին, կա՛մ «ցրողական» քաղաքականություն է վարում:

Նա իր «անճարակությունից» ելնելով էլ փորձում է մեղքը բարդել ինչ-որ մտացածին «դավադրության» և սևազգեստների վրա: Փաշինյանը թույլ տվեց, որպեսզի դեռ իր կողքին կանգնած «բանակը» քարկոծի Արցախի նախագահ Բակո Սահակյանին ու նրան մեղադրի դավաճանության մեջ՝ էլ մարդասպան, էլ Քոչարյանի հանցակից ու հազար ու մի զրպարտություններ հնչեցին Բակո Սահակյանի հասցեին: Իհարկե, Բակո Սահակյանը արժանապատվորեն պատասխանեց այդ հարձակումներին: Սակայն այստեղ խնդիրն այն է, որ Փաշինյանն Արցախի հարցում «չկա»՝ «թեմայի մեջ չէ»...

Նա «չկա» նաև ՀՀ արտաքին ու ներքին քաղաքականության մեջ. ո՛չ մի առաջընթաց, ո՛չ մի նոր ներդրում, ո՛չ մի ներգաղթի ավելացում, ո՛չ մի աղքատության նվազում:

Իհարկել ինչպես ասում են՝ Մոսկվան միանգամից չեն կառուցում, սակայն այս մեկ տարվա ընթացքում ո՛չ միայն չի կառուցվում, այլև քանդվում են եղած արտաքին հարաբերություններն ու երկրի տնտեսությունը:

Ու չի բացառվում, որ Փաշինյանը դա զգալով, որոշել է հեռանալ, բայց փորձում է այնպես անել, որ գոնե իր հեռացումը լինի ժողովրդի կամքով: Այսինքն՝ ժողովուրդը պահանջի նրա հրաժարականը...

Այդպե՞ս է դա, թե՞ ոչ, համենայնդեպ, հարցում արված է ու ստեղծված իրավիճակին յուրովի են արձագանքել ՀՀ քաղաքացիները, որոնց հպարտությունը չի խանգարել իրականությանը նայել առանց վարդագույն ակնոցի: Ներկայացնում ենք «Իմ քայլի» հարցմանը մասնակցած քաղաքացիների մեկնաբանություններից մի քանիսը...

Հիշեցնենք, որ վերջիններս պատասխանել են հարցին, թե արդյոք գո՞հ են Փաշինյանի ղեկավարումից...