Ինչ է փոխվել 2-րդ նախագահի հանդեպ վերաբերմունքի մասով

Վերջին օրերին Հայաստանում բավական հետաքրքիր դեպքեր տեղի ունեցան։

Նախ, Հայաստանի երկրորդ նախագահ Ռոբերտ Քոչարյանի՝ ընդդեմ ՀՀ գործող վարչապետ Նիկոլ Փաշինյանի քաղաքացիական հայցը ունեցավ բավական հետաքրքիր ու անսպասելի լուծում և ապա, Վերաքննիչ դատարանը մերժեց «Առաջին լրատվական» կայքի վերաքննիչ գանգատը՝ Քոչարյանն ընդդեմ «Սկիզբ մեդիա կենտրոն» ՍՊԸ-ի» գործի հետ կապված։

Առաջին դեպքում վարչապետ Փաշինյանըն իր ներկայացուցիչների միջոցով հրաժարվել է իր խոսքերից, ասելով, որ դրանք նախագահ Քոչարյանին չեն հասցեագրվել, իսկ երկրորդ գործով արդեն՝ ուժի մեջ է մնացել նախագահ Քոչարյանի հայցի առնչությամբ կայացված վճիռը, որով «Առաջին լրատվական» կայքը պարտավոր է հերքում հրապարակել իր մի շարք հոդվածներում նախագահ Քոչարյանի մասին՝ իրականությանը չհամապատասխանող տեղեկություններ հրապարակելու համար։

Եթե մի պահ նախագահ Քոչարյանի մասով հիմնական դատավարությունը դնենք մի կողմ, ապա այս երկու դրվագները կարող են որոշակիորեն հուշել, որ փոխվել է վերաբերմունք ՀՀ երկրորդ նախագահի ու նրա հետ կապված գործերի հետ։

Դժվար է ասել, թե վերաբերմունքի նման փոփոխությունը ինչ հիմքեր ունի։ Կամ իշխանական թիմը հասկացել է, որ «լրիվ ջուր» գործերով վերջ ի վերջո խայտառակվելու է եթե ոչ ազգային դատական համակարգում, ապա միջազգային ատյաններում, ինչպես, օրինակ, ՄԻԵԴ-ում, ու որոշել է ամեն բան բերել խաղաղ հանգուցալուծման, «դեմքը փրկելու» համար, կամ էլ, հնարավոր է, որ նախագահի Քոչարյանին ի աջակցություն աշխարհաքաղաքական հայտնի ուժային կենտրոնից ճնշում է գործադրվել իշխող թիմի ու անձամբ Փաշինյանի վրա և վերջինս Մոսկվայի զայրույթը էլ ավելի չգրգռելու համար, որոշել է զիջել։

Երկու դեպքում էլ փաշինյանական ձեռագիրը նկատելի է։ Խոսքը նախ պատասխանատվությունից խուսափելու՝ փաշինյանական մաներայի մասին է ու ապա՝ զիջել որոշ հարցերում՝ ամբողջը չկորցնելու մտավախությունից ելնելով։ Ինքնին հասկանալի է, որ Փաշինյանը զուտ դեմագոգիկ-պոպուլիստական մակարդակում պահպանելու է, այսպես ասած, «թրենդային տոնը» զոմբիացված զանգվածին կերակրելու համար, սակայն իրական քաղաքականությունից գլուխ հանողներն այս մեսիջների տակ շատ բան կարող են հասկանալ ու վերլուծել։

NEWSPRESS.am