«Ասել են՝ տղա ունես, սիրուն աղջիկ ունես...». գործարանի սեփականատիրոջը սպառնացել են ատրճանակով (վիդեո, ֆոտո)
«Շիրինշին» ՍՊ ընկերության /նախկին անվանումը «Շինֆորում» ՍՊԸ նախկին աշխատակիցները բողոքի ակցիա են կազմակերպել: Նրանք պահանջում են վերադարձնել իրենց գործարանը և վերականգնել իրենց աշխատանքը:
Նրանք փակել են գործարանի մուտքը: «Շինֆորում» ՍՊԸ նախկին տնօրեն Տիգրան Գասպարյանը NEWSPRESS.am-ի հետ զրույցում պատմեց, որ պարտքերի պատճառով չի կարողացել միայնակ գործարկել իր գործարանը: Նա 2017-ի աշնանը սկսել է համագործարկցել ոմն Արկադի Շիրինյանի (Խալաստոյ մանկանվամբ) հետ, ով, Տիգրան Գասպարյանի խոսքով, նախկին նախագահ Սերժ Սարգսյանի մտերիմներից է:
Վերջինս խոստացել է ներդրում անել, այնուհետև ներդրումը փոխարինվել է փոխառության, իսկ 2018-ի ապրիլի 18-ին, հեղափոխության հենց սկզբնական շրջանում, սեփականացրել է գործարանը, այն վերանվանել «Շիրինշին» ՍՊԸ և տնօրեն նշանակել գործարանի նախկին իրավաբանին՝ Արթուր Արմենակյանին:
Սակայն, ինչպես Տիգրան Գասպարյանը, այնպես էլ գործարանի նախկին՝ 130 աշխատակիցները, վստահեցնում են, որ Շիրինյանը գործարանին տիրացել է խաբեությամբ և բռնի ուժով:
«Ինձ Արթուր Արմենակյանը դեռ էն ժամանակ զգուշացնում էր, որ գործարանն ուզում են ձեռքիցս վերցնել, բայց չէի լսում: Ինքն էր ինձ առաջարկում, որ ծախեմ ու գումարը վերցնեմ: Հիմա ինքն ա ծախվել ու տնօրեն դարձել»,- ասում է գործարանի նախկին ղեկավարը:
Աշխատակիցներն էլ վստահեցնում են, որ սպառնալիքներ են եղել:
«Էդ մարդուն իրա տղով, աղջկանով, կնկանով են վախեցրել, որ զավոդը ձեռքից առել են»,-մեզ հետ զրույցում ասում է Նորագյուղի բնակչուհի տիկին Գայանեն, ում ամուսինն ու որդին գործարանում են աշխատել:
Աշխատակիցները պատմում են, որ 50% համասեփականատիրոջն են ընտանիքով վախեցրել.
«Ասել են՝ տղա ունես, սիրուն աղջիկ ունես....»,-պատմում են մեր զրուցակիցները:
Վերջիններս կաթվածահար են արել գործարանի աշխատանքը և նշում են, որ չեն լքի տարածքը, մինչև չկատարեն իրենց պահանջները:
