Հանձնաժողովը փուչիկ էր, ու այդ փուչիկը հենց ՀՔԾ-ի գլխին է պայթելու. զոհված զինվորների մայրերը վրդովված են (տեսանյութեր)

«Խաղաղության երկխոսություն» հասարակական կազմակերպությունը դադարեցրել է իր գործունեությունը ՀՀ Քննչական կոմիտեի նախաձեռնությամբ ստեղծված հասարակական մոնիթորինգի աշխատանքային խմբում: Վերջինս ստեղծվել էր խաղաղ պայմաններում զոհված զինվորների մահվան դեպքերի առթիվ հարուցված քրեական գործերն ուսումնասիրելու նպատակով: Սակայն,  փաստաբան Էդգար խաչատրյանն իր ֆեյսբուքյան էջում էր  գրել, զոհված զինվորների մայրերն էլ NEWSPRESS.am-ի հետ զրույցում նկատեցին, որ թեև գործերը կասեցումից հանվել են, սակայն հանձնաժողովին նյութեր չեն տրամադրվում: Ու քանի որ այդ պայմաններում խոչընդոտվում է  հանձանաժողովի արդյունավետ աշխատանքը՝ «Խաղաղության երկխոսություն» ՀԿ-ն՝ Էդգար խաչատրյանի գլխավորությամբ, դուրս է եկել հանձնաժողովից:

Մասնավորապես, Վալերիկ Մուրադյանի մայրը՝ Նանա Մուրադյանը մեզ հետ զրույցում նկատում է, որ թեև կասեցումից հանեցին գործերը և հանձնաժողով ստեղծվեց, սակայն այդ հանձնաժողովը փուչիկ էր:

Տիգրան Օհանջանյանի մայրն էլ՝ Գոհար Սարգսյանը, նկատեց, որ այդ փուչիկը պայթելու է հենց ՀՔԾ-ի գլխին:

Նանա Մուրադյանը հավելեց նաև, որ սա առաջին դեպքը չէ, որ գործը կասեցումից հանում են: Նման դեպք նախորդ իշխանությունների ժամանակ էլ են արել, բայց ինչպես այն ժամանակ, այսօր էլ ոչ մի արդյունք չկա:

«Է, մինչև ե՞րբ. ինչքա՞ն պետք է ես սպասեմ, որ կասեցումից հանեն ու արդյունք լինի, դեռ 9 տարի էլ պետք է պայքարե՞մ»,-մեզ հետ զրույցում ասաց Նանա Մուրադյանն ու հավելեց, որ մինչև այսօր էլ բանակում դեռ սպանությունները շարունակվում են: