Նաիրի Հունանյանն ու դաժան մարդասպանները կհայտնվեն ազատության մեջ

Հայաստանի Հանրապետության Ազգային ժողովն ընդունել է ՀՀ քրեակատարողական օրենսգրքում փոփոխություններ կատարելու մասին օրենքի նախագիծը և լուծել ցմահ ազատազրկման դատապարտվածներին ազատության մեջ հայտնվելու հնարավորության հարցը։

Հունիսի 3-ին այս օրենքի նախագիծը ՀՀ նախագահ Արմեն Սարգսյանը ստորագրել է, և այս ստորագրությունից տասն օր անց, ցմահ ազատազրկվածները կկարողանան իրենց պատիժը կրել բաց ռեժիմում, իսկ սա ենթադրում է, որ նրանք առավոտյան դուրս կգան կալանավայրից և երեկոյան կմտնեն պատժախուց։

Այս օրենքը հիանալի առիթ է ցմահ դատապարտված դաժանաբար մարդ սպանած Մհեր Ենոքյանի և Հոկտեմբերի 27-ի ոճրագործությունն իրականացրած Նաիրի Հունանյանի համար. նրանք շուտով կհայտնվեն ազատության մեջ։

Փաստորեն, Մհեր Ենոքյանի կինը՝ Զարուհի Մեջլումյանը, այս ամիսներին հանգիստ իր տեղը չի նստել և լուրջ աշխատանքներ է տարել սորոսական կառույցների և նրանց կողմից արդարադատության նախարարություն գործուղված սորոսական պաշտոնյաների հետ։

Այդ ժամանակ, վախենալով հանրային ճնշումից, Նիկոլ Փաշինյանը չվտանգեց իր վարկանիշն ու դեռ ամիսներ առաջ Մհեր Ենոքյանի ներման խնդրագիրը նախագահ Արմեն Սարգսյանին չներկայացրեց, ով անխոս, հլու-հնազանդ ստորագրելու էր այն։

Իհարկե, Զարուհի Մեջլումյանը սիրելի ամուսնու ներման խնդրագրի մերժումից հետո բավարարվեց մի պաթետիկ գրառմամբ, բայց նաև զգուշացրեց՝ ամեն ինչ դեռ առջևում է։
Նա դեռ այն ժամանակ հստակ գիտակցում էր, որ եթե պետք է, օրենքում փոփոխություն կկատարի այս իշխանությունն՝ իր սիրելի մարդասպանին բանտից հանելու համար։
Զարուհու հանգստության պատճառն, անշուշտ, քրեակատարողական օրենսգրքի սպասվելիք փոփոխությունն էր, որը հենց գուցե տեղի է ունեցել նրա թելադրանքով։

Ինչ խոսք, նոր Հայաստանում ցմահ ազատազրկվածներն այսուհետ կլինեն ազատության մեջ․ սա է նոր իշխանության բարեփոխիչ դերակատարումը հանցանք չկատարած հատվածի համար։

Իշխանությունն իր առաջ նպատակ է դրել դատարկել բանտերը հանցագործներից․ հոգ չէ, որ հանցագործների մեջ ոչ հանցագործ հատվածը կապրի սարսափի զգացումով, իսկ որ ամենավատն է՝ իշխանությունը կստեղծի նախադեպ, որ կարող ես հանցագործություն կատարել առանձնակի դաժանությամբ ու չզրկվել արևի լույսից։

Իսկ սա «թավշյա Հայաստանի» ողբերգությունն է․․․

NEWSPRESS.am