«Չակերտը» «Հայոց հարց» դարձավ. Ավանեսյանը Խուդոյանի վարքագծի մեջ միտում է տեսնում (ֆոտո, վիդեո)

Խաչատուր Աբովյանի անվան հայկական պետական մանկավարժական համալսարանի դասախոս, հոգեբանական գիտությունների դոկտոր, պրոֆեսոր Սամվել Խուդոյանը կազմակերպել էր հանդիպում: Նրա նախաձեռնությամբ, ԲՈԿ-ի նախագահ Սմբատ Գոգյանը քննարկման էր հրավիրել մասնագետների ու լրատվամիջոցների ներկայացուցիչների: 

Նա վիճարկում էր մի ատենախոսություն, որի գիտական ղեկավարն է նույն համալսարանի դասախոս, հոգեբանական գիտությունների դոկտոր, պրոֆեսոր, ԵՊՀ ընդհանուր հոգեբանության ամբիոնի վարիչ, փորձարարական հոգեբանության գիտահետազոտական լաբորատորիայի ղեկավար Հրանտ Ավանեսյանը,

Այս ատենախոսությունը խնդիր չէր առաջացնի, եթե Սամվել Խուդոյանի մոտ հարց չառաջանար, թե ատենախոսության մեջ ռուսերենից թարգմանությունը չակերտների մե՞ջ պետք է գրել, թե՞ ոչ: Նա անտեսում էր ատենախոսության մեջ արված հղումների աղբյուրները: Որպես դասախոս՝ ատենախոսության մեջ դրա գիտական նշանակությունը կարևորելու փոխարեն, Խուդոյանը պնդում էր, որ ատենախսությունը լիարժեք չէ, քանի որ այնտեղ չակերտներ չկան:

Ըստ նրա՝ եթե չկա չակերտ, ուրեմն դա գրագողություն է:

Հավաքված մասնագետները զուր էին փորձում բացատրել Խուդոյանին, որ չակերտի վրա կենտրոնանալն այնքան էլ լուրջ չէ:

Ու քանի որ հավաքված մյուս մասնագետներն ատենախոսությունը, որպես գիտական աշխատանք, միայն դրական ներկայացրեցին, ուստի NEWSPRESS.am-ը հետաքրքրվեց հենց Սամվել Խուդոյանից, թե արդյոք չկա՞ իր կողմից որևէ միտում՝ աշխատանքը բացասական գնահատելու և այն գրագողության անվան տակ վարկաբեկելու: 

«Ո՛չ, ես ոչ մի միտում չունեմ»,- ասաց Խուդոյանը: Հարցին, թե գուցե խնդիրներ կան հենց այդ երիտասարդի՞ հետ կապված, Խուդոյանը ևս բացասական պատասխանեց. «Ո՛չ, ես ոչ մի խնդիր չունեմ այդ երիտասարդի հետ»:

Դիտարկմանը, թե միգուցե երիտասարդը պարզապես մոռացել է չակերտներ դնել, կամ խնդիր չի տեսել չակերտների, քանի որ նա նշել է իր աշխատանքի աղբյուրները և մանրակրկիտ բացատրեց, թե ինչ տարբերակով է հղումներ արել, Խուդոյանն արձագանքեց, թե չակերտները պարտադիր են, և մեզ հանձնեց ատենապետության օրինակը:

Աշխատանքի մեջ, ի դեպ, մանրակրկիտ նշված են հեղինակներն ու հղումներ են արված աղբյուրին:

Գիտական ղեկավար Հրանտ Ավանեսյանն էլ նկատեց, որ աշխատանքը շատ լավ է կատարված, իսկ Խուդոյանի վարքագծի մեջ միտում է տեսնում: Ավանեսյանը Խուդոյանի՝ գրագողության մասին հայտարարությունը զրպարտություն է համարում:

«Ոչ մի պաշտպանության մեջ պարոն Խուդոյանը ատենախոսության գիտական աստիճանի, որակի, կարևորության ու մեթոդաբանության վերաբերյալ դիտողություն չի անում, նրա դիտողությունները սևեռված են մի բանի վրա՝ ճի՞շտ է արված հղումը, թե՞ ոչ», -ասում է Հրանտ Ավանեսյանը: