Ադրբեջանը կարող է օգտվել տարածաշրջանում տիրող լարվածությունից և սկսել ռազմական գործողություններ. քաղաքագետ

Մինչ Հայաստանում զբաղված են խորհրդարանական շոուներին հետևելով՝ տարածաշրջանում լարվածությունը խորանում է։ Այս մասին այսօր լրագրողների հետ զրույցում ասաց քաղաքագետ Աղասի Ենոքյանը: Նրա դիտարկմամբ՝ Հայաստանի հանրությունը թերագնահատում է տարածաշրջանում լարվածության հնարավոր հետևանքները:

Քաղաքագետը մատնանշում է ԱՄՆ-ի և Իրանի լարված հարաբերությունները, որն առաջ է եկել ԱՄՆ ղեկավար Թրամփի՝ նոր պատժամիջոցներ մտցնելուց հետո: Նրա խոսքով՝ լարվածություն կա նաև Վրաստանի և Ադրբեջանի միջև։ Աղասի Ենոքյանը մտահոգիչ է համարում նաև Ղարաբաղի հարցով հնչեցրած հայտարարությունը, ըստ որի նախատեսվում է խաղաղարարներ մտցնել տարածաշրջան:

«Թեև հայկական կողմը մերժել է, բայց ես այս դեպքում հակված եմ հավատալու Մամեդյարովին։ Դա այն է, ինչի մասին արդեն ասվել է՝ Լավրովի պլանը»,- նշեց քաղաքագետը։

Նա չբացառեց, որ Վրաստանում տեղի ունեցող իրադարձությունները սադրանք է: Այն, ինչ տեղի է ունենում այնտեղ, քաղաքագետը նմանեցնում է Հայաստանում մեկ տարի առաջ տեղի ունեցածին՝ ժողովուրդը դժգոհ է կյանքից, դժգոհ է Ռուսաստանի հետ հարաբերություններից:

Ամեն դեպքում, Աղասի Ենոքյանը վստահ է, որ լարվածության հետևանքները կարող են լինել շատ լուրջ Հայաստանի համար։ «Հայաստանը պետք է ունենա դիրքորոշում կատարվողի հանդեպ, և լավ կլիներ արագ արտահայտել այն»,- նկատեց քաղաքագետը:

Ի վերջո, նա չի բացառում, որ տարածաշրջանում տիրող ընդհանուր լարվածությունը կարող է գայթակղել Ադրբեջանին՝ ռազմական գործողություններ սկսելու համար: